Isihlalo sengane sibekwa ngemuva
NGIZWA ngisukwa yisipoliyane esithi mangihayize ngisho kudume emawa ukuthi bonke abashayeli bokudumayo mazikhuze sakuziqoqa izinkayimane zabo balungiselele ukuchezukela lapho kuphephe khona.
Masingakhohlwa belu ukuqhweba amahazard ethu ngesikhathi sisathe gozololo lapho kuphephe khona ukuze sivumele amehlo ethu angqengqe phezu kwale ngosi ngaphandle kokuphazamiseka.
Olwanamhlanje ufuqane lokuqongqotha ama hazard lungifikela ngisePort Edward ogwini oluseningizimu kude buduze neWild Coast lena ephesheya koMthavuna. Ngithi ngiphonsa amehlo kule moto eseceleni kwami ngibona ingane imile ithe phuhle esihlalweni esiseceleni kwesomshayeli. Ngishaywe wuvalo ngoba kuyacaca ukuthi lo mshayeli akakuqondi ukuthi uma kungehla ingozi kungachitheka izishebo, ingane yakhe ebukeka ineminyaka emithathu iyothanqazeka ngaphandle kwemoto nokukhuphula amathuba okulimala kakhulu noma okushona. Kunabashayeli abavamise ukutotosa izingane zabo ngokuthi bayashayela bazigonile nazo ziphulula iziteringi kodwa kube kusemgwaqweni womphakathi. Kukhona abanye abathanda ukuzihlalisa ngemuva kwabo kodwa bazivumele uma zima zithi phuhle phakathi kwezihlalo. Miningi imigilingwane esiyenzayo singabashayeli.
Iningi labashayeli abanezihlalo zabantwana ezimotweni zabo bavamise ukuzibeka ohlangothini lwangakwesokunxele ngoba bethi benzela ukuthi bakwazi ukuyibona kalula ingane ngesikhathi imoto ihamba. Abanye bajwayele ukuthi babeke izihlalo zabantwana zibheke emuva.
Cishe konke lokhu esengikubalile kuyicala elibomvu. Uma ngibuza kuMnuz Sipho Kunene weMega Driving Skills (PTY) Ltd, uthi zonke izingane kusukela kweqeda kuzalwa kuya kwezina-12, akufanele zizihlalele ngaphandle kwesihlalo sabantwana emotweni ehambayo.
Nami ngiyavumelana naye yize kade ngingayazi ukuthi iminyaka ihamba ize ifike kwemingaki. Uzokhumbnula ukuthi sake sayithi jwathu indaba yezimpawu ezinanyathiselwa ezimotweni ezichaza ukuthi kunengane ngaphakathi.
Lapho sakuveza ukuthi lezo zimpawana zisebenza ukukhombisa abezimo eziphuthumayo esimweni sengozi ukuthi kule moto kunengane ngakho kufanele baphuthume yona ingane. Njengoba isikhathi esiningi isiteringi semoto singasohlangothini lwesokudla nabosizo olushesheyo bavamise ukuqhamuka ngasohlangothini lomshayeli uma befika endaweni yengozi kulapho-ke bezobona ingane kalula uma ingemumva kwakhe umshayeli.
Lena yinyanga yabesibhuda ngiyazi ukuthi nakuba abashayeli besilisa behamba nezingane kodwa abantu okujwayeleke kakhulu ukuthi ubathole behamba nabantwana ezimotweni kuba abashayeli besifazane yingakho-ke kungaba kuhle uma nabo beyifunda le ngosi.
Namaqola ezimoto, yebo wona kanye lawa ebesikhuluma ngawo ngenyanga edlule, athushuka ngakumshayeli ngakho uma ethi nhla emva kwakhe azosheshe abone ukuthi kunengane emotweni bese emnika ithuba lokuyikhipha ngokushesha.
UMtimande uthi ngokocwaningo lwakhe ezigamekweni zokudunwa kwezimoto ezingu-32 000 eNingizimu Afrika, zingu-11 kuphela okubikwa ukuthi zathathwa nezingane ezingu-10 kuzo izingane zatholakala ziphila zingenamyocu.
Ngiyazi ukuthi sekukhona abanombuzo ukuthi uma imoto kuyiveni elingenazo izihlalo ngemumva noma kuyisilahla esigibela abantu ababili kuphela kumiswa kanjani. Lezo zimoto azidalelwe ukugibelisa izingane kodwa uma kwenzeka uzigibelisa isihlalo sihlehlise sigcine ngci emumva bese isihlalo sengane usibophela usibhekise lapho kubheke ngakhona imoto. Lapho wenzela ukuthi uma kwenzeka ingozi, i-air bag ingaqhumeli ebusweni bengane ngoba ingalimala kanzima.
Hhayi-ke sethembe abashayeli abanezindlebe bazwile. Thina sesingawavala la ama hazard ethu okwanamhlanje, kukude eThekwini ngise Port Edward. Masiqhubeke nokushayela ngendlela ehlonipha yonke imithetho yezokushayela injengoba injalo ukuze sihlangane sisaphephile nangesonto elizayo kuyo le ngosi yezezimoto.
Uma ufuna siyiqhube le ndaba ngena ekhasini lethu kuFacebook othi Igedlela lami with Sthembiso Shangase. Yimi owenu nali ikheli ngezansi hazardiso@ gmail.com.