Usizwe ‘ukuhletshelwa’ obezunywa owezemfundo
USINDE olakeni lukaNgqongqoshe wezeMfundo KwaZulu-Natal uthishanhloko wesikole samabanga aphezulu saseLindelani eThekwini, iThandolwesizwe High ngoLwesihlanu. UMnuz Mthandeni Dlungwane ubethi uzuma uthishanhloko uNkk Thobile Phungula engazelele kanti kukhona abazomhlebela ukuthi akalungise esikoleni sakhe ngoba kuza uDlungwane.
UDlungwane ubehambele umcimbi wokuvulwa ngokusemthethweni kwesikole samabanga aphansi iDuduzani Primary, okuyisikole esakhelene neThandolwesizwe kanti uzobona izingane zigcaluza ngesikhathi sokufunda. Uthe eqambe enikela eThandolwesizwe wafica uNkk Phungula esesehhovisi lakhe futhi nezingane sezisemakilasini. Ufike wabuza uNkk Phungula ukuthi isikole sakhe senze kanjani kwa-matric nyakenye, wathi uma uNkk Phungula ethi sithole u-42%, wathukuthela kakhulu.
“Yihlazo leli! Ngiyabona ukuthi kukhona abakuhlebelile ukuthi ngiza lapha, bengithi ngifuna ukutheleka ungazi njengoba bekunezingane ebezigcwele ngaphandle ngesikhathi sesikole.”
UNgqongqoshe unxuse uNkk Phungula ukuthi abhukule ngempela ngoba sekusele izinsuku ezingu-79 kubhalwe izivivinyo zokuphela konyaka. Usuke lapho waqonda kwelinye ikilasi lapho efike khona wakhuthaza abafundi ba-matric ukuba bazimisele ukuze bakhuphule izinga lokuphasa kulesi sikole. “Anginandaba nokuthi nitholani iphesenti elingaki kodwa ngifuna niphumelele ukuze ningalahlekelwa yisikhathi kulo nyaka futhi nibe nekusasa eliqhakazile.”
UNkk Phungula ubonge kakhulu futhi wathembisa ukuthi kulo nyaka bahlose ukuphumelela ngo-75% futhi wacela kuDlungwane umuntu ozobasiza.