Kwethulwe umkhankaso wabakwa-matric
SEZIZOFUNDISA nangempelasonto izikole zasesifundeni, uMlaza, ezathola ngaphansi kuka-60% kwa-matric nyakenye.
Othisha balezi zikole bazoqeqeshwa kuthi abafundi abadudulelwe kwa-matric baqoqelwe ezikhungweni abazofundiswa kuzona.
Lokhu kuvezwe ngumqondisi walesi sifunda esikhulu kulesi sifundazwe ngezibalo zabafundi abenza u-matric, uMnuz Bheki Ntuli ngesikhathi kwethulwa umkhankaso wokuphusha abafundi ukuthi benze kahle kwa-matric obuseGlenwood High ngoLwesihlanu.
UNtuli, ekhuluma nothishanhloko bezikole zamabanga aphezulu ezingu-179 kulesi sifunda, uthe isikhathi sokulala siphelile kuze kubhalwe iphepha lokugcina lika-matric ngoNovemba.
“Amaholidi aphelile, umthwalo ukunina bothishanhloko ukuthi niphushe abafundi okokugcina ukuze sikwazi ukuthola imiphumela emihle. Sizohlangana nabazali nabafundi abadudulwa sibanike umbiko wokuthi benzekanjani laba bafundi ngoba asifuni ukubashiya ngaphandle,” kusho uNtuli.
Uthe kulesi sifunda kunabafundi abangu-2 300 abadudulelwe kwa-matric.
“Sizobafundisela ezikhungweni ezingu-15 kulesi sifunda ngoba sizimisele ngokuthi nabo benze kahle. Kulokhu sigxile kakhulu nasezikoleni ezinezibalo eziphezulu zabafundi abenza u-matric, njengaseComtech ngabangu-321. Uma lezi zikole zehla nesifunda siyehla ngoba baningi abafundi. Lezi zikole ziholwa uGwini Comprehensive ngabafundi abangu-503 kwamatric,” kusho uNtuli.
Uthe izikole ezazingamaModel C nezizimele abazishiyanga ngaphandle ngoba nazo zinomthelela ekwehleni kwezinga lokuphasa.
“Sifuna zonke izikole ezazingamaModel C zithole u-100%. Uma isikole esifana neDurban Girls High ikwazi ukuthola u-100% iminyaka engu21 ilandelana ezinye zingahlulwa yini? IMenzi High eselokishini (eMlaza) ithola u-100% iminyaka eyisikhombisa ilandelana ngakho nezinye izikole zingakwazi ukuphasa ngale ndlela,” kusho uNtuli.
Uthe bakhathazekile ngezikole ezizimele ngoba zehlisa izinga lokuphasa.
“Izikole ezingama-finishing school ziningi kulesi sifunda. Uma zenza kabi kwa-matric nathi siyathinteka yingakho nazo zingasalanga ngaphandle.”
UNtuli uthe lesi sifunda sinabafundi abangu-25 000 abazobhala u-matric, wathi singaphezulu ngisho kwezifundazwe iFree State neNorthern Cape ezinabafundi cishe abalinganiselwa kulesi sibalo.
UMfundisi Thomas Radebe, wezinkulumo ezakhayo kuKhozi FM, ugqugquzele othishanhloko nothisha ukuthi bangabe besabheka eceleni ngoba sekusele izinyanga ezimbalwa ngaphambi kokuba abafundi bavune abebekutshala.
“Uma lesi sifunda senza kahle nesifundazwe sizonyuka. Yingakho sifaka isandla emfundweni ngoba akuwona umsebenzi kahulumeni kuphela kodwa owethu sonke. Abazali nabo abeseke izingane zabo ngalesi sikhathi bangayekeleli kothisha,” kusho uRadebe.