I-Downs ayineme ngo-Irvin Khoza
KUNGENZEKA bethulwe kanye kanye oGeorge Lebese no-Oupa Manyisa kwiMamelodi Sundowns. Abafana Ba Style basezingxoxweni zokusayinisa laba badlali ababili abadume kwiKaizer Chiefs ne-Orlando Pirates.
Leli phephandaba lihoshe izindaba zokuthi iSundowns ihlela ukuthi ibathule bobabili laba badlali uma konke kuhambe ngohlelo.
“ISundowns ayiyithandanga indlela iPirates eyenze ngayo. Usihlalo wePirates (u-Irvin Khoza) wethule umdlali iSundowns ingakavumelani naye ngezidingo zakhe. Njengamanje iyona into esabambile ekutheni iSundowns yethule uManyisa ngokusemthethweni. Ngemuva kokumenyezelwa kwezindaba zokuthi usebheke kwiSundowns uManyisa uyekile ukujima nePirates.
“Njengamanje useqalile ukujima neSundowns. Osekusele wukuthi aqedele indaba yezidingo zakhe bese eyasayina. Enye into ebambile yile ndaba yokushintshisana ngabadlali. ISundowns ihlalele ethembeni lokuthi izoqeda ngayo yonke le nto maduze bese yethula umdlali. Uma konke kuhamba kahle kungenzeka athulwe noGeorge Lebese. ISundowns ixoxa neChiefs ngokuthi kudayiselwane lo mdlali,” kusho umthombo.
ULebese akazange abonakale emidlalweni emibili edlule yeChiefs. Ubengekho kuCarling Black Label Cup ngesikhathi Amakhosi equmba phansi i-Orlando Pirates ngo-1-0 wegoli likaBernard Parker e-FNB Stadium, eSoweto, eGoli.
Leli nxele liphinde langabonakala ngesikhathi iChiefs ithelwa othulini yiChippa United ngo-1-0 wegoli likaKatlego “Mahoota” Mashego kuPremier’s Cup eSisa Dukashe, e-Eastern Cape ngempelasonto.
“ULebese uvele useyitshelile iChiefs ukuthi akasathandi ukudlala kuyona. ISundowns kudala imfuna. Isiyithintile iChiefs futhi ixoxa indaba yemali okumele kudayiselwane ngayo umdlali,” kusho umthombo.
Ezinyangeni ezedlule uLebese uke wabhala ekhasini lakhe lika-twitter ukuthi ufuna ukudlala ibhola futhi akanandaba ukuthi ugqoke liphi ijezi inqobo nje uma ezonikwa ithuba lokudlala.
Selokhu kufike uSteve Komphela kuChiefs kumasizini amabili adlule uLebese akadlali njalo. Kuthintwa uThulani Thuswa wezokuxhumana kwiSundowns uveze ukuthi ngeke bakwazi ukuphawula ngoLebese ngoba usenenkontileka neChiefs.
“Lapha kwiSundowns siyawahlonipha amanye amaqembu. Ngakho ngeke sikwazi ukuphawula ngomdlali osenenkontileka neqembu elithize. ULebese usenenkontileka neChiefs futhi ungumdlali wayo. KwiSundowns sikholelwa ekwenzeni izinto ngendlela eqondile. Uma sesiqede yonke into noManyisa sizomemezela. Okwamanje kunezinto esisazama ukuziqedela,” kusho uThuswa.
Uyichithile indaba yokuthi uRhulani Mokwena akekho kwiSundowns. Lo mqeqeshi uyasoleka kwabakhonjwa emsebenzini wokuba yiphini lomqeqeshi omusha wePirates uMilutin “Micho” Sredojevic nesokulekelela uStuart Baxter kwiBafana Bafana.
“URhulani usekhempini neqembu eRusternburg. Uke wahamba ezinsuku ezimbili eyolungisa izinto eziphathelene naye. EyePirates neBafana Bafana asiyazi,” kusho uThuswa.
UVina Maphosa wezokuxhumana kwiChiefs uthe akanalo ulwazi ngodaba lukaLebese. Belukhala lungabanjwa ucingo lukaSteve Kapelischnik ophethe izindaba
zikaLebese ebesifisa asikhanyisele.