Kushone obese ebonakale emidlalweni eminingi
Durban Durban IZULU lilelesa liphindelela endimeni yokulingisa emuva kokuvela kwezindaba zokudlula emhlabeni kukaMary Makgatho ongowokuzalwa eMoruleng, eRustenburg.
UMary, obesezinze eGoli nobesebonakale emidlalweni eminingi, kuthiwa ushone ngemuva kogula isikhashana.
Kuthiwa wawa washayeka umgogodla ngenyanga edlule. Walala egunjini labagula kakhulu esibhedlela.
Udadewabo kamufi, uRose, uthe bengumndeni basacela ukunikwa isikhathi. “Yebo udadewethu udlule emhlabeni namhlanje ekuseni kodwa ngicela uthinte abantu abazokutshela konke akade besebenza naye sibagunyazile ukuthi bakhulume ngalolu daba. Besingakulindele lokhu, sihlukumezekile ngempela yilokhu okwenzekile.”
Imenenja yakhe, uCarlynn de Waal-Smit, uthe uMakgatho ushone ngemuva kokuhlala amasonto ambalwa esibhedlela. “Ngifonelwe wumndeni wakhe ekuseni ungibikela ngalezi zindaba zokudlula kukaMary. Ngesikhathi esibhedlela bebona ukuthi ulimele kanzima bamfaka egunjini labagula kakhulu ngoJulayi 10. Umndeni uthi wazilimaza yena ngesikhathi ewa, wawa kabi.”
Abantu ezinkundleni zokuxhumana bazwakalise ukudumala ngokudlula kwalo mlingisi. USheron Shez Simelane uthe: ubemubi lo nyaka.
UZamar Zulu uthe: Hawu bakwethu lomama engimthanda kangaka sengathi umoya wakhe ungalala ngokuthula. Ayi kunzima kulo nyaka. UMic Teshy Scowter uthe: ngimazi ngoMalimpho enza uhlelo iTakalani Sesame. Angikholwa, umoya wakhe uphumule ngoxolo. Ungqongqoshe wamaSiko namaCiko, uMnuz Nathi Mthethwa, ubhale enkundleni yokuxhumana uTwitter edlulisela amazwi enduduzo emndenini kaMary. “Ngiyazwelana nomdeni, izihlobo nabathandiweyo benqgalabutho ekulingiseni uMary esithola izindaba zokudlula kwakhe emhlabeni,” kubhala uMthethwa. UMary ubesebonakale emidlalweni eminingi okukhona kuyo Emzini Wezinsizwa, Yizo Yizo, Generations, Rhythm City.