UThando uyayishiya iGenerations

UKUBA matasa ngeminye imisebenzi kwenze ukuthi umlingisi weGenerations: The Legacy, uThando Thabethe, asule kulo mdlalo.

Izolo iGenerations: The Legacy, ekhonjiswa ngo-8 ebusuku phakathi nesonto kuSABC 1, imemezele ukuthi uThando odlala indawo kaNolwazi Buzo uyashiya kulo mdlalo.

Okhulumela lo mdlalo uGaaratwe Mokhethi uthe kwiGenerations kuqoshwa kusukela ngo-7 ekuseni kuze kube wu-7 ebusuku.

“Kuba nzima kuye ngenxa yeminye imisebenzi yakhe,” kusho uGaaratwe.

Kulo nyaka uThando unikezwe umsebenzi wokusakaza uhlelo lwantambama kwi-5 FM, iThe Thabooty Drive ngo-3 kuya ku-6 ntambama phakathi nesonto.

UGaaratwe uthe ababhali abakasithathi isinqumo sokuthi ngabe kuzophela yini ngendawo kaNolwazi noma kukhona omunye umuntu ozoyithatha.

“Njengamanje basagxile ekutheni uzophuma kanjani,” kusho uGaaratwe. Uthe uzogcina ukubonakala ngesonto lokuqala kuJanuwari wonyaka ozayo. UThando esitatimendeni ubonge abantu abesebenza nabo kulo mdlalo wathi isinqumo asithathile besingekho lula. “Iminyaka engiyihlalile kwiGenerations: The Legacy ibimnandi. Kube yithuba eliyingqayizivele ukusebenzisana nalo mndeni. “Ukulingisa indawo kaNolwazi kuyiguqulile impilo yami. Ngifunde okuningi ngami, nangomsebenzi wokulingisa, konke lokhu kungenxa yabadidiyeli, abaqondisi, ababhali, abalingisi, abasebenzi kodwa ikakhulukazi ababukeli. Bekungesona isinqumo esilula lesi kodwa ngizohamba nazo zonke izifundo engizitholile,” kusho uThando.

Isithombe: ITUMELENG ENGLISH UMLINGISI ophinde abe wumsakazi uThando Thabethe uyashiya kwiGenerations: The Legacy lapho ebedlala khona indawo kaNolwazi Buzo

THUMELA umbono ngalolu daba kuFacebook (Isolezwe), kuTwitter (@isolezwenews) noma umqhafazo ku-45773. I-sms ibiza R1,50.