UMarawa uqinisekise eyokugqabuka kwegoda phakathi kwakhe noPearl

UMETHULI wezinhlelo zemidlalo, uRobert Marawa, uthi umemezele ngokuhlukana kwakhe noPearl Thusi ngoba kukhona abantu abebemthinta bemazisa uma bembona ephumile.

“Sekuphelile ngoba abantu bebecabanga ukuthi uma bebona umuntu ephume esebenza, noma eshutha noThiery (Henry) noma nabantu beNBA kumele bangazise. Engikushoyo wukuthi abame kancane ngokungithinta, akusho lutho kimina,” kusho uMarawa.

UMarawa ubekhuluma ohlelweni i-East Coast Breakfast kaDarren Maule kwi-East Coast Radio izolo ekuseni.

Ubuye wabhala ngeSonto ebusuku eqinisekisa amahlebezi okuthi ubudlelwano bakhe noPearl buphele ezinyangeni ezimbalwa ezedlule. Uthe sebengabangani.

Imizamo yokuthola uPearl ayiphumelelanga njengoba owesifazane obambe ucingo ethe uPearl akasayisebenzisi inombolo ashayelwe kuyo. Enye inombolo ibikhala ingabanjwa futhi nomqhafazo othunyelwe kuyo awuphendulwanga.

UMarawa uthe ukhululekile emoyeni. Uthe akakhulumi ngezindaba zakhe.

“Ngivikela uhlangothi lwami ngoba ngokuhamba kwesikhathi kukhona umuntu ozokhuluma ngento engekho,” kusho uMarawa.

Uthe impilo iyaqhubeka, akuxatshenwe.

Uqhube wathi: “ULuther Vandross ngesikhathi kukhona ombuza ukuthi uyisitabane yini wathi, “into engikukweleta yona yithalente lami”. Nami into engiyikweleta abantu baseNingizimu Afrika engikwenza emsakazweni nakuthelevishini. Okunye angikukweleti muntu.”