Kuzocaca namuhla ngekusasa likaZuma
OLWAMANQAMU namhlanje kuMengameli Jacob Zuma njengoba ikusasa lakhe lilele emalungwini e-ANC angu-249 azovotela ukuthi achithwe noma aqhubeke nokuba ngumengameli wezwe.
Izolo, uSomlomo wePhalamende uNksz Baleka Mbete unqume ukuthi ukuvota kuzoba ngokuyimfihlo njengoba amaqembu aphikisayo abefuna.
“Ngisibhekisisile lesi simo ngezwa nezikhalo zabantu kanye nezinhlangano ezizimele ngase nginquma ukuthi ivoti libe yimfihlo. Lesi sinqumo ngisithathe ngoba ngicabangela izwe,” kusho uNksz Mbete.
Umbuzo omkhulu ngowokuthi ngabe uZuma uzophuma embusweni noma uzophinde aphunyuke futhi njengoba esephunyuke izikhawu eziyisikhombisa?
Ukukhishwa kukaZuma esikhundleni kuyosho ukuthi kumele kukhethwe umengameli ngokushesha.
Lolu hlelo kumele lwenziwe ngemuva kwezinsuku ezingu-30 kuvotiwe njengoba uSomlomo ezoba eyibamba likamengameli.
Uma kugcina ngokuthi kungakhethwa umengameli omusha lokho kuyosho ukuhlakazwa kwePhalamende bese kubizwa ukhetho ngokushesha.
Ukukhishwa ngevoti kukaZuma kuyosho ukuthi isigungu sakhe soNgqongqoshe naso kumele sishenxe.
Ngokombiko weBusiness Report enguzakwabo weSolezwe, ngesikhathi kumenyezelwa ukuthi leli voti lizoba yimfihlo irandi lisimeme laba ngu-R13.24 uma liqhathaniswa ne-dollar kanti kwipound libe ngu-R17.35, kwathi uma liqhathaniswa ne-euro laba ngu-R15.74.
Umhlaziyi wezepolitiki uMnuz Protas Madlala, uthe mancane amathuba okuthi uZuma uzokhishwa esikhundleni.
Uthe izibalo aziwavuni amaqembu aphikisayo, abukeka kwawona ehlukene phakathi.
“Uma ubheka i-APC kaThemba Godi namanye amaqembu awayingeni eyaleli voti. Ukuze uZuma akhishwe kumele wonke amaqembu aphikisayo abe khona ePhalamende avotele ukuthi uZuma ahambe kuphinde kube namalungu angu-60 e-ANC azokweseka lesi siphakamiso,” kusho uMadlala.
UDkt Bheki Mngomezulu, weMzala Nxumalo, uthe mancane amathuba okuthi uZuma aphume ngoba amaqembu aphikisayo awahlangene. “Amaqembu aphikisayo angu12 kudingeka wonke abe khona. Uma ubheka amane awahambisani nokukhishwa kukaZuma ngakho aseyashayeka aphikisayo. Ayikho into emthethweni ebiphoqa uMbete ukuthi avume kuvotwe ngokuyimfihlo ukwenze lokhu ngoba evikela isithunzi sakhe njengoba ehlale esolwa ngokuthi uchemile,” kusho uMngomezulu. Uthe ukuvota ngale ndlela kuzovala isahluko kulolu daba. “Uma amaqembu aphikisayo ekhala ngaphansi ngeke aphinde ayikhulume eyokuchitha uZuma ngoba azobe ehlulekile. Akulula futhi ukubona ukuthi amalungu avote kanjani ngakho akusekho ukwesaba kumalungu e-ANC angeneme.” Uthe uma uZuma ekhishwa uNksz Mbete angaba nethuba lokuphatha izinsuku ezingu-30.