Samukelwe yi-ANC isinqumo sikaSomlomo kolwevoti eliyimfihlo
I-ANC ithe iyasamukela isinqumo sikaSomlomo wePhalamende sokuthi kuvotwe ngokuyimfihlo namhlanje uma sekuvotelwa ukuthi uMengameli Jacob Zuma ehle noma angehli esihlalweni.
Okhulumela i-ANC, uMnuz Zizi Kodwa, uthe bayawawethemba amalungu e-ANC ePhalamende ukuthi azokwenza okulindelekile.
“Leli voti lizophinde lingaphumeleli futhi njengamanye. Siyazi ukuthi umsebenzi wamaqembu aphikisayo wukuphikisa i-ANC ngakho asithukile siyazi ukuthi kusasa (namuhla) sizophumelela,” kusho uKodwa.
Okhulumela ikhokhasi ye-ANC ePhalamende, uNksz Nonceba Mhlauli, uthe bebelokhu bemile ekutheni bazokweseka zonke izinqumo zikaSomlomo.
Uthe ivoti lokungamethembi uZuma lenzelwa ukubukela phansi uhulumeni owakhethwa abantu.
“Sizosiphikisa lesi siphakamiso ngeke sivote namaqembu aphikisayo. Sifuna ukucacisa ukuthi ayilona iqiniso imibiko yokuthi amalungu angu-95 e-ANC azovotela ukuchitha uZuma.”
Amaqembu aphikisayo ancome uSomlomo ngokutshengisa ukuthi akachemile. Umholi we-UDM, uMnuz Bantu Holomisa, uthe yisikhathi sokuthi amalungu e-ANC aphumele obala achithe uZuma. Uthe avikelwa wumthetho othi noma angavotela ukuthi akahambe i-ANC ngeke iwathathele izinyathelo.
Umholi we-DA, uMnuz Mmusi Maimane uthe bayasamukela isinqumo ngoba sizokhipha uZuma emandleni.
“Izwe lizothuthuka uma ekhishwa ngoba wahlomulisa abangani bakhe wabukela phansi nomthethosisekelo nesifungo asenza,” kusho uMaimane.
UMnuz Julius Malema, umholi we-EFF, uthe kusasa uZuma uzobe engeyena uMengameli.
Uthe uma kwenzeka ephinda ephunyuka bazoqhubeka baxoxe namaqembu aphikisayo ngoba bafuna ahambe.
“Uma kwenzeka ekhishwa ngeke seseke umengameli ozongena noma kuthiwa uqhamuka emaqenjini aphikisayo. Alikho ilungu elingacasha ngokuthi lizothathelwa izinyathelo ngokuvotela ukuthi kuhambe uZuma,” kusho uMalema.
UMnuz Narend Singh we-IFP uthe bazobhalela iPhalamende ngoba bafuna ukwazi ukuthi imiphi imigomo ezolandelwa uma sekuvotwa.
“Siyajabula ngoba kuzoba nomengameli wesifazane obambile kusasa ngosuku lwabesifazane.”
Umholi weCope, uMnuz Mosiuoa Lekota uthe amaqembu afana ne-Agang ayaseseka lesi siphakamiso.
USihlalo we-ANC KwaZuluNatal, uMnuz Sihle Zikalala, ushaya phansi ngonyawo uthi kusasa uZuma uzobe esangumengameli wakuleli.
Ekhuluma nabezindaba ngemuva kokwethula inkulumo evala iLekgotla ye-ANC izolo, uZikalala uthe ukuthi kuvotwa ngokuyimfihlo noma ngokuvulelekile akusho lutho kubona. Uthe uZuma akayi ndawo usazolihola iqembu kuze kushaye u-2019.
Namhlanje kuzoba namamashi ezinhlangano ezehlukene ePhalamende ezifuna uZuma ehle esikhundleni.
Izolo, abefundisi eThekwini bebenomkhuleko wokweseka uZuma bethi ukwehliswa kwakhe kuzodala izinkinga ezweni.