Basathukile eMbongolwane
SUNGAZE ubulale abantu bakwenu pho ngesihluku esingaka, ubashise bangqongqe?”
Lawa ngamazwi elinye lamalungu omndeni wakwaNtshangase ebelibalisa izolo ngesikhathi Isolezwe lihambele imindeni yabangqongqiswe ngomlilo ezintathakusa zangeSonto, eMatini, eMbongolwane.
Ubusungaphika ukuthi kulo muzi bekufinywa ngendololwane ngempelasonto njengoba usizi belubhalwe emehlweni kumalungu omndeni, kumapeketwane oMnuz Doda Ntshangase (71), Gama Ntshangase (44) bashe baba ngumlotha ngesikhathi kushiswa indlu abebelele kuyo, kwathi uMnuz Bongani Bhengu (35) wadutshulelwa ngasesibayeni salo muzi ezama ukubaleka.
UNkk Nomanganga Ngonyama ongudadewabo kaDoda omdala, uthe okwehlele amalungu omndeni wabo kusabethusile.
“Ngaphambi kokuba omunye wabafana athathwe ayiswe esibhedlela, ubashilo abenze le nto. Kubuhlungu ngoba umfowethu ufe ngesandla somuntu wakhona emndenini. Kodwa sesiyekele emaphoyiseni ukuthi enze umsebenzi wawo,” kusho uNkk Ngonyama.
Nasemzini wakwaNtshangase esigodini saseMphundumane, kubo kaMnuz Gama Ntshangase, bekuwusizi. UNksz Lihle Ntshangase oyindodakazi kamufi, uthe bebethembele kuyise. “Ubaba ubebamba amatoho enza isiqiniseko sokuthi mina nogogo silala sidlile. Siyaqala ukwenzeka isigameko esinjena kule ndawo sigcina ngokusizwa ngendaba,” kusho uNksz Ntshangase
UNkk Ntombiyedlozi Ntshangase obenzele umyeni wakhe umsebenzi, uthe namanje akukavumi nokuthi akhulume ngenxa yokwethuka.
“Abebehlasela baqale ngokukhipha izibani ebezikhanya emnyango. Ngizwe kuqhuma isibhamu esiqhume kaningi kwathi uma siphuma sabona indlu ebilele abesilisa igqamuka amalangabi. Ngizwe omunye obekhala esibayeni ebiza obehlasela ngegama,” kuchaza uNkk Ntshangase.
Uthe akekho oyilungu lomndeni wakhe oshonile kulesi sigameko kodwa amadodana amabili akhona okungoMnuz Njabulo noNkanyiso Ntshangase asesimeni esibucayi esibhedlela.
UNkk Zazini Bhengu ongunina kaBongani uthe akuvumi ngisho adle ngenxa yobuhlungu benhliziyo. “Besihambe naye ngoba bekunomsebenzi kamfowethu. Ngifike kuye esaphefumula kodwa engasakwazi ukukhuluma. Inhliziyo yami ibuhlungu kakhulu ngoba bese besele bebathathu kuphela ezinganeni ezingu-7 ebenginazo,” kubalisa uNkk Bhengu.
Phambilini ilungu lomndeni elikhulume neSolezwe lisole umbango wobukhosi ngalesi sigameko.
Kuthintwa inkosi, uMnuz Xolani Ntshangase, ithe: “Akukho engizokukhuluma nani. Bekumele ningithinte ngaphambi kokushicilela udaba. Qhubekani nalowo onitshele ukuthi lesi sigameko ngesombango.”