UZikalala uvikela uDlamini Zuma
USIHLALO we-ANC KwaZulu-Natal uMnuz Sihle Zikalala ukhwele wadilika kulabo abathi uDkt Nkosazana Dlamini Zuma akangakhethelwa esikhundleni sikamengameli ngoba nakhu wayeshade noMengameli Jacob Zuma.
Ethula inkulumo yakhe ngesikhathi evala i-lekgotla ye-ANC yaKwaZuluNatal eCoastlands Hotel, eThekwini, izolo, uZikalala uthe kwaKhongolose abaholi abakhethwa ngoba nakhu kuthiwa basuka kumuphi umndeni noma basondelene nobani kodwa bakhethwa ngenxa yomlando, amava neqhaza labo emzabalazweni.
“Labo abathi uDlamini Zuma akumele akhethwe njengomengameli benza iphutha futhi babuka izinto bazihlanekezele. Kwa-ANC sikhetha abantu ngokwesiqu sabo hhayi ngokuthi basondelene nobani, uma kunjalo kungani singashongo ukuthi ngeke size simkhethe uMnuz Thabo Mbeki esikhundleni sikamengameli ngoba uyise uMnuz Govan Mbeki wayengumengameli,” kusho uZikalala.
Uthe ngeke baze bakhethe umholi ngoba nakhu befuna ukujabulisa izitha ezilwisana nomzabalazo ikakhulukazi ongxiwankulu.
Uthe umholi ofunwa ngongxiwankulu kumele azingabaze ukuthi uyiqabane langempela.
UZikalala uthe amagatsha e-ANC azonquma ukuthi afuna ukuholwa ngubani engqungqutheleni kaDisemba.
“Sizowahlalisa amagatsha lapha eKZN bese eyanquma ukuthi afuna ukuholwa ngubani, thina njengobuholi besifundazwe sizobe sesithatha umbono wawo siwudayisele amanye amagatsha kwezinye izifundazwe ezweni lonke,” kusho uZikalala.
Uthe ngeke baze balawulwe ngamaqembu aphikisayo ukuthi kumele bahole kanjani.
UDkt Dlamini Zuma ubanga isikhundla sikamengameli noMnuz Cyril Ramaphosa.
Bakhona nabanye abaholi be-ANC absigaqele lesi sikhundla kubalwa kubo uDkt Zweli Mkhize, uMnuz Jeff Radebe, uNksz Lindiwe Sisulu noMnuz Mathews Phosa.