Akaxoshwa ngani uMduduzi Manana esikhundleni?
SIGXEKWE nxa zonke isenzo sePhini likaNgqongqoshe lezeMfundo ePhakeme kuzwelonke, uMnuz Mduduzi Manana neqembu abehamba nalo sokushaya abesifazane baze bakhunyulwe izinwele zokufakelwa eCubana, eFourways, eGoli ngeSonto.
Nakuba uManana egcine exolisile ngalesi senzo kodwa kushone elayizolo ikhula ingcindezi yokuthi akhonjwe indlela kuhulumeni ngoba akasona isibonelo esihle. Ubegxekwa ngokuthi njengomholi bekumele angayenzi into efuze le ikakhulu njengoba kuyinyanga yabesifazane.
I-EFF, PAC, ANC, uphiko lwabesifazane lwe-ANC, i-ANC Youth League, DA, NFP, ikhomishini yezobulili basigxekile isenzo sikaManana.
Kuthiwa kube nengxabano phakathi kwakhe nabesifazane abathathu abebehambele le ndawo ngemuva kokuthi omunye wabo embize ngesitabane.
UNksz Mandisa Duma (30), ovule icala lokushaywa nguManana, uthe bebehleli eduzane netafula uManana abekulo nabangani bakhe kukhulunywa ngokuthi ngubani ongase abe ngumengameli we-ANC olandelayo ngesikhathi uManana ethi ufuna ukuphawula.
Uthe umzala wakhe ukhiphe iselula efuna ukushutha i-video kodwa umngani kaManana wamtshela ukuthi angayishuthi.
“Umzala uthe uMduduzi okumele anqabe ukuthi ashuthwe, wanqaba uManana wayibeka iselula. Uphenduke wabuza ukuthi singobani nokuthi kungani sihleli nabo wabiza abaqapha le ndawo ukuthi bazosikhipha. Bese sisukumile sesihamba, umzala wambiza ngesitabane wase emshaya ngempama, wamkhahlela wamdonsa nangezinwele,” kusho uNksz Duma.
Uthe bamkhahlelile naye, bamshaya bamdonsa nangezinwele, kwathi umngani wakhe obezama ukusiza bamphushela kude.
Uqhube wathi ngesikhathi kwenzeka lokhu abaqaphi bebezibukele bengenzi lutho.
Uvule icala esiteshni samaphoyisa iDouglasdale.
UManana, esitatimendeni, uxolisile kuNksz Duma, emndenini wakhe, kubantu bakuleli nakuhulumeni ngesenzo sakhe. “Lesi sehlo esimbi bekungamele senzeke. Ngiyazi engikwenzile, nalabo ebengihamba nabo kuphathe kabi abantu abaningi. Njengomholi, bekumele ngingenzi into enje. Ngizobambisana nabomthetho,” kusho uManana.
Uthe kukhona abavule ikhasi elingumkokotelo ezinkundleni zokuxhumana elimveza njengomuntu ongazisoli ngakwenzile elingcolisa negama lakhe.
“Uma isikhathi sesifikile ngizoya ngiyoxoxa noNksz Duma nomndeni wakhe ngixolise. Ngizohlangana ne-ANC, kanjalo noMengameli Jacob Zuma ngiyochaza ngokwezenkile,” kusho uManana.
UZuma uthe ukhathazekile ngezinsolo zokushaywa kwabesifazane okuthiwa kwenziwe nguManana.
Okhulumela uZuma, uDkt Bongani Ngqulunga, uthe unethemba ukuthi umthetho uzothatha indawo yawo njengoba noNgqongqoshe wamaPhoyisa, uMnuz Fikile Mbalula, ethe amaphoyisa ayasiphenya lesi sehlakalo.