UManana udicilele phansi eyokuvikelwa kwabesifazane
ISENZO sePhini likaNgqongqoshe weMfundo ePhakeme uMnuz Mduduzi Manana sibi, siyihlazo, siyanenga futhi kumele ajeze ngaso. Izolo uManana ube ngundabuzekwayo ngemuva kokusabalala kwe-video okuthiwa kuyo ubemukluza phambi kwabantu owesifazane.
Ngokwe-video nenye ingxoxo eqoshiwe uManana ugane unwabu ngemuva kokubizwa ngesitabane yile ntokazi abebehleli nayo endaweni yokucima ukoma eseGoli ezintathakusa zangeSonto.
Kuvela le ntokazi ishaywa ize iwe phansi, abanye abebehleli nabo bemile bebuka kanti kuthiwa abaqaphi nemeneja yakule ndawo nabo bebebuka.
UManana uyilungu lesigungu esiphezulu se-ANC, uyilungu lePhalamende futhi ukwiKhabhinethi.
Lokhu kusho ukuthi kumele aziphathe ngendlela ehloniphekile, abe yisibonelo esihle emphakathini.
Yingakho izolo ebegxekwa nxazonke ngoba asolwa ngakho kufana nokuthela ngeqanda lenjelwane imikhankaso enhlobonhlobo ekhona ezweni, yokulwa nesihlava sokuhlukunyezwa kwabesifazane nezingane esihlasele eNingizimu Afrika.
Nathi siyakugxeka ukuhlukunyezwa kwabesifazane nezingane futhi labo abatholakala benecala lokwenza lokhu kumele bajeziswe.
UNgqongqoshe wezamaPhoyisa uMnuz Fikile Mbalula kulezi zinsuku akupheli olimini lwakhe ukuthi bazimisele ukuvikela abesifazane nezingane futhi kumele bajeze ababahlukumezayo.
Njengoba uManana ezivumele yena lesi senzo waze waxolisa kule ntokazi, umndeni wayo nakuhulumeni, sekumele umthetho uthathe indawo njengoba livuliwe necala.
Lesi sigameko sifakazela okuhlale kuvezwa njengembangela yokuhlukunyezwa kwabesifazane, okuwukuthi abanye abantu esikhundleni sokulungisa izinto ngezinye izindlela, baba nodlame.
Odabeni lukaManana-ke akumele kubukwe indaba yodlame kuphela kepha neyokuthi ucasulwe wukubizwa ngesitabane.
Ukubhodla kwakhe umlilo ngokubizwa ngesitabane ngabe kusho ukucwasa noma ukuhluleka ukubekezela abathandana nabobulili obufanayo yini?