Uyasibulala ugesi wethu ngokumba eqolo
MHLELI: Angijwayele ukukubhalela kodwa ngikholelwa wukuthi ukwenzenjalo kwami kuzosisiza nalabo abasabayo ukuphawula kanti nezikhulu zingake zincinzeke bese ziyanyakaza.
Cha sesikhathele siyizakhamuzi zasoLundi yimali kagesi emba eqolo. Ake nisilamulele bo ngoba uma ufika emalokishini akwamanye amadolobha uxoxa ukuthi wena ama-unit awu-50 uwathola ngo-R120 okungugesi wezinsuku ezimbili ngenhlanhlake zingaba ntathu kuye nangokuthi nibangaki noma ninezimpahla ezingakanani zikagesi, bakhuza bababaze. Usungabala-ke ukuthi ngenyanga ugcine uwuthenge ngamalini.
Angisho ukuthi thina sisuke singakuboni yini ukuxhaphazeka kwethu kodwa lokho kuba wubufakazi. Umasipala wethu uyasixhaphaza mgempela la Olundi.
Njengezintatheli ninawo amandla okuphenya ngakho sicela nisiphenyele ubuqiniso bokuthi umasipala wethu ubekwe ezingeni lezindawo ezifana noRichards Bay, okuyidolobha elicebe kakhulu. Izikhulu zikamasipala wethu zikwenza lokhu ukuze zithole imiholo nemihlomulo ephezulu ekubeni thina singumphakathi kwenza sikhumuke kakhulu ephaketheni uma kuza ekukhokheleni izinto ezifana namarates, ugesi nazo zonke nje izidingo ezikhokhelwayo kumasipala.
Izikhulu ziyenqaba ukuba i-Eskom kube yiyo esidayisela ugesi ngqo ngoba ziyazi ukuthi lokho kuyokwenza siwuthole ngemali ephansi kanti namathuba okuthi zihlomule ngalobu buqili azophela.
Ngikhuluma nje njengoba kuqala inyanga enomoya u-Agasti bavelelwe abantu, ikakhulukazi abakwa-A, ngogesi onqamuka njalo kuyoze kushaye unyaka ozayo sekuphele ihlobo ngoba lisuke liduma.
Kulezi zinsuku nje unqamuka unqamukile, ikakhulukazi ntambama kuze kuyolalwa. Awukwazi nokupheka kufa nempahla kodwa ugesi wethu uyabiza. Ehlobo-ke khona lithi liqala nje ukuduma kabili kathathu nqamukiyane ugesi uyoze ubuye ngakusasa uma lidume sekushayisiwe emsebenzini. Okhathazekile OLUNDI