Luthela izithelo ezinhle ucwaningo ngezibhedlela ezizimele
LWENZA umehluko ekuthuthukisweni kwezinhlelo zezempilo ezibhedlela ezizimele ucwaningo olunika iziguli ithuba lokuphefumula ngempatho eziyithola ezibhedlela ezizimele.
Lokhu kuvezwe yimiphumela yocwaningo lomshwalense wezempilo iDiscovery Health Patient Survey Score (PaSS) wango-2016. Ucwaningo luveza uvo lweziguli ngezibhedlela ezizimele eNingizimu Afrika.
Izibhedlela, iThekwini Hospital and Heart Centre, Gateway Private Hospital, Life Bay View Private Hospital nezinye zibalwe kwezingu-20 kuleli ezenza umsebenzi oncomekayo ekunakekeleni iziguli.
Ucwaningo, olulandelwa emhlabeni wonke, lunika iziguli ithuba lokuthi ziveze uvo lwazo ngendlela eziphathwe ngayo ezibhedlela kusukela zingena zize ziphume.
Iziguli ziletha iziphakamiso ngokusingathwa kwezinhlelo zezempilo ezibhedlela ziphinde ziveze lapho okusadingeka ukuthi kulungiswe khona.
UDkt Roshini Moodley Naidoo, owengamele uphiko olubhekele ukuhlinzekwa kosizo lwezempilo olusezingeni elicokeme eDiscovery Health, uthe kubalulekile kubona ukuthi baqinisekise ukuthi izinhlelo zezempilo ziba sezingeni elifanele.
“Uhlelo lwezempilo olusezingeni elifanele luqinisekisa ukuthi iziguli zinakekelwa ngokufanele luphinde lusize ekugwemeni ukusetshenziswa ngokungenasidingo kwemali. Ukunika umphakathi ithuba lokuphawula ngosizo lwezempilo olutholayo kuzosiza ekwenzeni ngcono isinhlelo zezempilo,” kusho uDkt Moodley Naidoo.
Uthe ngenxa yalolu cwaningo seluthuthukile usizo lwezempilo olunikwa iziguli ezikhungweni ezahlukene. Uqhube wathi kusukela kuqale ukuthi isatshalaliswe imiphumela yocwaningo babona okuhlukile ezimpendulweni ezikhishwa yiziguli ngokuphathwa kwazo ezikhungweni zezempilo.
Ukuze uthole izimpendulo zeziguli lo mshwalense uyaye uxhumane neziguli ezingamalungu awo uma seziphumile esibhedlela bese zibuzwa imibuzo ngokulala kwazo esibhedlela.
Eminye yemibuzo ebuzwayo kuba ngethinta ukunakekelwa kwazo uma zinezinhlungu, ukulungiselelwa ukukhishwa kwazo esibhedlela, yindlela ezichaza ngayo izikhungo uma zichazela iziguli ngezinto ezithinta ukugula kwazo zikwenza ngendlela ecacile nokulula ukuthi iqondakale nangenhlonipho yini, nokunye.
Ukuqinisekisa ukuthi imiphumela ayigcini ikhombisa isithombe esingelona iqiniso kubhekwa izimo ezisebenza kuzona izibhedlela nokuthi okubikwa yiziguli okungekuhle bekungagwemeka yini. Kubhekwa neminye imininingwane yeziguli esuke ingaba nomthelela endleleni eziphathwe ngayo.
Zilinganiselwa ku-136 izibhedlela ezibe yingxenye yocwaningo.
UDkt Moodley Naidoo ukucacisile ukuthi amaphoyinti isibhedlela esiwanikwa yisiguli awachazi ukuthi senza kahle noma senza kabi yini. Aveza ukuthi yini edinga ukwenziwa ukwenza ngcono isimo ekunakekelweni kweziguli.
Kusuka kuqale lolu cwaningo ngo-2014 sinyukile isibalo seziguli ezikhombisa intshisekelo ekuphenduleni ngempatho eziyithole ezibhedlela.