Uhlonishwe ngendondo yokuba ngumphathi ovelele
UKUBA ngowesifazane okhulisa izingane eyedwa akumphazamisi emsebenzini wakhe wokuba ngumholi oqotho, ohlabene ngendondo yokuba ngumphathi ovelele kulo nyaka ngesikhathi kuklonyeliswa amaphoyisa enze kahle esifundazweni.
UBrigadier Zandile Kunene (50), ongowokuzalwa eLadysmith, oyiPhini loMphathi eThekwini Inner Cluster, uklonyeliswe ngendondo emcimbini wezindondo ama-SAPS Provincial Excellence Award, eThekwini.
UBrigadier Kunene, onezingane ezintathu, uthe uqhutshwa wuthando lo msebenzi wakhe yikho ekwazi ukumelana nezinselelo zasekhaya nezomsebenzi ngaphandle kwengcindezi.
“Ukuba yiphoyisa yinto engikhule isenhliziyweni yami. Ngenxa yothando lomsebenzi, kimina kuba lula ukwenza umsebenzi wami bese kuthi uma sengiphumile emsebenzini ngibe wumama onikeza umndeni wakhe uthando olufanele njengoba ubaba wekhaya esashona,” kusho uBrigadier Kunene.
Phakathi kwezinto ezimenze waqokwa njengovelele, kubalwa ukulula kwakhe isandla emphakathini. Ubesekhaleni emkhankasweni wokunikelela umphakathi odingayo ngezingubo, ukudla nokunye. Uphinde wanikela ngo-R10 000 ukuthi kwakhiwe isonto endaweni yaseMazizini, eBergville. Ugqugquzele nemikhankaso lapho bekuba nezivimbamgwaqo eziholele ekuboshweni kwenqaba yabebeshayela bedle amanzi amponjwana nabantu bangaphandle abakuleli ngokungemthetho.
Abanye besifazane abathole ukuhlonishwa , nguConstable Thenjiwe Magwaza osoPhikweni lwezokuXhumana esifundazweni obe ngunobhala ovelele, umphathi wesiteshi sasePort Shepstone, uBrigadier Sandra Nala, obe ngowesifazane ovelele.