Uyazikhandla umbhukudi wase-DHS
UKUBA lukhuni kwesigaba aseqhudelana kusona uSabelo Mlaba oneminyaka engu-14 ubudala odle isicoco sokuba ovelele kwiLets Play ka-Ephreli ku-2017, kumphoqa ukuba aziqeqeshe ngaphambi kokuya esikoleni aphinde enze okufanayo uma esebuya khona.
Ngaphambi kokuya esikoleni iDurban High School (DHS) ngaseMusgrave, uMlaba uqala azilolonge nomqeqeshi wakhe kwiLondon Dolphins Swimming Club, uMxolisi Zungu, eSutton Park Pool eseMorningside noma kweyaseKings Park. Lokhu kungenxa yokuqina kwezinga uMlaba asebhukuda kulona manje ngokusho komqeqeshi wakhe uZungu. “Kuyaphoqa ukuthi siziqeqeshe ekuseni ngaphambi kokuya esikoleni. Yinto efanayo futhi uma esebuya khona. Lokhu kwenzeka izinsuku ezinhlanu esontweni. Kuyaphoqa ukuthi aziqeqeshe ngale ndlela ngoba ukhule ngesivinini kulo mdlalo futhi izinga akulona manje liyaphoqa ukuthi isimo sakhe sihlale siseqophelweni esliphezulu,” kusho uZungu. Ezikhulumela uMlaba ofike kumaSalga Games ngaphansi koGu District ngemuva kokuwinela iTheku amagolide amahlanu namasiliva amane, uthe: “Indaba iqale ngiminza ngiseneminyaka emine kumbe emihlanu. Lokhu kwenzeke kweminye yemizi yezihlobo kodwa ngahlengwa. Kusukela ngalelo langa kukhona okwakheka kimina ngokubhukuda. Ngifisa ukufana nomqeqeshi wami uZungu noChad le Clos engibukela kubona konke.”
UMlaba ugila izimanga kuzona zonke izigaba afika kuzona. NgoFebhuwari nonyaka ungene okokuqala kuma-SA Interprovincial /KZN level 1 abeseThekwini wagoduka namagolide amane nawethusi amathathu. Udlulele ku-level 2 kuzwelonke (eSasolburg) lapho bekukhona nababhukudi baseZimbabwe, Namibia namanye amazwe ase-Afrika lapho edle khona amasiliva amabili ebhukuda ngezitayela ezahlukene ku-50m.
“Kuyangikuthaza ukukhethwa yiLets Play ngoba kuzongenza ngibe nomfutho wokuqhubeka noma ngizwa ukuthi sekunzima. Ukwazi ukuthi kunabathile abafisa ukufana nawe kuyakhuthaza kukodwa,” usonge kanje uMlaba.