Uzobhekana nenzima uMcCarthy
UZOBHEKANA nomqansa zibekwa umqeqeshi omusha weCape Town City, uBenni McCarthy, obhekwe ngabaningi ngesizini ka-2017/2018.
UMcCarthy, okunguyena yedwa umdlali waseNingizimu Afrika osawine indebe ye-UEFA Champions League, uzoqala uhambo lwakhe njengomqeqeshi ku-Absa Premiership. Usihlalo weCity, uJohn Comitis, usevele uphumele obala ngokuthi ngeke amfake ingcindezi uMcCathy ngesizini yakhe yokuqala kodwa ubheke ukuthi iqembu lakhe lenze kangcono kunedlule.
I-The Citizens ibiqeqeshwa ngu-Eric Tinkler ngesizini edlule banqoba indebe yeTelkom Knockout. UMcCarthy uzothola isivivinyo sokuqala kwiPolokwane City uma sebebhekene koweMTN 8 eCape Town City Stadium ngoMgqibelo ngo-3 ntambama.
Emuva kwalokho koweligi uzobhekana nomqeqeshi owamnika ithuba lokudlala esigabeni esikhokhelayo, uGavin Hunt, uma sebebhekene neBidvest Wits ngo-Agasti 18. UMcCarthy wanikwa ithuba nguHunt kuSeven Stars ngo1995. Emdlalweni wobungani emasontweni edlule uMcCarthy ukhale ngaphansi ngo 1-0 kuHunt ohola ompetha beMTN 8 nesicoco seligi.
Emidlalweni elandelayo yeligi uMcCarthy kufanele aqhamuke namaqhinga okudlula kwiPlatinum Stars ngo-Agasti 23, Kaizer Chiefs (Septhemba 13) ne-Orlando Pirates(Septhemba 19).
Ngaphandle kukaMcCarthy, abaqeqeshi abasha kwiPremiership babhekwe ngabomvu. Kulabo baqeqeshi kukhona owePlatinum Stars uPeter Butler obepheka iqembu lesizwe laseBotswana. IStars ihlukane nabadlali abaningi okukhona kubona uNdumiso Mabena osegijima kwiBloemfontein Celtic nobeyiphini lomqeqeshi uWillem Jackson engavuselelwanga inkontileka yakhe.
IDikwena izovula isizini ekhaya ngoAgasti 20 neMaritzburg United nokuyilapho kuzobe kubhekwe khona okusha okufike noButler kuleli qembu elishaye into ephansi ngesizini edlule. Emuva kwalokho izobhekana neCape Town City, SuperSport United neChippa United ngokulandelana.
KwaZulu-Natal wonke amehlo akumqeqeshi waMaZulu, uJoey Antipas, ozobe eqala ukuqeqesha kwiPremiership. Uhlulekile ukunyusela Usuthu kwiPremiership emuva kwesizini eluqeqesha kwiNational First Division (NFD). AmaZulu athenge isitifiketi seThanda Royal Zulu ewine iligi yeNFD ngesizini ka-2016/2017. U-Antipas unengcindezi yokuzakhela ukwethenjwa ngabalandeli. Emdlalweni wokuqala wesizini uzokwamukela iFree State Stars eKing Zwelithini Stadium, eMlaza, ngo-Agasti 19. Emuva kwalokho AmaZulu azobhekana neChippa United, Maritzburg neLamontville Golden Arrows ngokulandelana.
Umqeqeshi okhuza ibuya kwiPirates, uMilutin Sredojevic, uyena okubukeka ezobe ebhekwe kakhulu ukuthi abuyise izinsuku zenjabulo kuleli qembu eliqede ngaphandle kweTop 8 ngesizini edlule. EZimnyama zithuse iningi zidedela obengukaputeni u-Oupa Manyisa osezogijima kwiMamelodi Sundowns. Emidlalweni emine yokuqala iPirates izobhekana neChippa United, Baroka, Ajax Cape Town neMaritzburg ngokulandelana.
UVeselin Jelusic ongumqeqeshi omusha weCeltic, uzokhombisa iNingizimu Afrika amagalelo akhe uma eseqala eyePremiership. Uzobhekana neKaizer Chiefs ngo-Agasti 20 ekhaya. Kweminye imidlalo uzodudulana ne-Arrows, Polokwane neBaroka.