UBhele ezinhlelweni zokuloba incwadi
INGWAZI yeBafana Bafana uSiyabonga “Bhele” Nomvethe ihlela ukubhala incwadi ekhuluma ngempilo yayo nangomlando wayo ebholeni.
UBhele (39) ukudalule lokhu ngesikhathi exoxa nabezindaba kwiPrincess Mangosuthu Legacy Cup, oLundi ngeledlule.
Kulo mqhudelwano uBhele uphinde wakhombisa ukuthi usaphila ehlohla amagoli amabili abekisele Usuthu indawo emdlalweni wamanqamu weMangosuthu Legacy Cup.
“Kuyisifiso sami ukubhala incwadi ekhuluma ngomlando wami ebholeni. Ibhola yisiphiwo kimina. Ngakho ngifuna ukuchazela abantu ngokusuka nokuhlala ngempilo yami ukuze ngigqugquzele intsha esakhula edlala ibhola,” kusho lo mdlali waKwaMashu.
UNomvethe usedlale kuyona yonke imiqhudelwano emikhulu. Wayekhona ngo-2000 ngesikhathi elakuleli lidlala kuma-Olympic Games. Ngo-2002 ubesesikwatini seBafana esidlale kwiNdebe yoMhlaba eJapan/Korea kwathi ngo-2010 waphinde wagijima kwiNdebe yoMhlaba.
“Phakathi kwezinto engizokhuluma ngazo yindaba yokubuya kwami eNingizimu Afrika ngizodlalela i-Orlando Pirates ekubeni ngangihambe ngidlala kwiKaizer Chiefs. Ngesikhathi ngibuya ngo2006 ngangibalekela intela. Inkontileka yami yayizophela futhi babezongigawula u-60% wentela ukube ngayivuselela. Ngaleyo ndlela ngaphoqeleka ukuthi ngizodlala eNingizimu Afrika izinyanga eziyisithupha bese ngibuyela phesheya kwezilwandle.
“Iqembu lokuqala engalithinta kwaba yiChiefs. Yangitshela ukuthi ifuna ukunginika inkontileka ende ngase ngisayina kwiPirates. Ngemuva kwalokho ngabuyela phesheya kwezilwandle. Nangesikhathi sengibuya ngo2009 ngayithinta iChiefs kodwa yathi isachitha abadlali. Ngabona kuhamba isikhathi ngasayina kwiMoroka Swallows. Ngabona ukuthi ngizoze ngigcine ngiye emaqenjini engingaqondile ukuya kuwona,” kusho uNomvethe.
Phesheya kwezilwandle uNomvethe udlale kwiUdinese Calcio yase-Italy, i-U.S Salernitana ne-Empoli FC okungamaqembu adlala esigabeni sesibili e-Italy, iDjurgardens IF yaseSweden ne-Aalborg yaseDenmark. UBhele udlale kuma-Afcon amathathu neBafana Bafana ayimele emidlalweni engu-81.