Kuzomele abhukule uVan Niekerk kwi-IAAF
KUBUKEKA kuzofanele alinyuse ngokudlulele izinga uWayde van Niekerk kowamanqamu emjahweni ka-400m kwi-IAAF World Championship kusihlwa.
Umjaho ungo-11.50pm kusihlwa ngokwesikhathi sakuleli. UVan Niekerk ongumpetha wama-Olympic lapho ephule irekhodi kuleli banga, uzobe elwela ukuvikela isicoco somhlaba asinqoba ngo-2015 eBeijing.
Imijaho emibili edlule yamanqamu lapho abagijimi bebethwelwe ngeqoma ayihambanga njengoba bekubhekiwe.
Isilomo saseGreat Britain, uMoh Farah, yisona esisajabulise izinkulungwane e-Olympic Stadium, ngoLwesihlanu olwedlule sinqoba umjaho ka-10 000m okwesithathu kulandelana. Nokho ngobusuku obulandelayo kube nebohlololo intandokazi u-Usain Bolt ihlulwa nguJustin Gatlin wase-USA kowamanqamu ka-100m. UBolt waseJamaica ubezimisele ngokuvalelisa ngenothi eliphezulu, engakaze ahlulwe njengoba esethi khumu kwezokugijima. Ekugcineni usivale ngethusi isahluko sakhe kwezokugijima emabangeni ehamba ngayedwana. NgeSonto kube esifanayo umkhaya kaBolt kwabesifazane, u-Elaine Thompson ekhala ngaphansi kowamanqamu ka-100m. UThompson ongumpetha wama-Olympic akalibonanga elidlalayo ehlulwa uTorie Bowie, wase-USA, phezu kokwenza kahle emijahweni yokuhlungela owamanqamu wagcina ethole indawo yesihlanu.
Lokhu kukhomba ngokusobala ukuthi kule midlalo kungenzeka noma yini okusho ukuthi uVan Niekerk kuzomele ashintshe amagiya uma ezimisele ngokuqhubeka nokujabulisa abalandeli bakhe. Kuma-semi final unqobe ngo-44.22. Kuzoshuba kowamanqamu, kuboshelwe imbangi enkulu kaVan Niekerk, u-Isaac Makwala waseBotswana obe nesizini enhle kwi-IAAF Diamond League, umgijimi osemncane waseBahamas uSteven Gardiner nomkhaya kaMakwala, uBaboloki Thebe.