UBrockie ufuna ukona umcimbi weChiefs
KUFANELE wukuthi ayikho into ezobe ibusa umqeqeshi weKaizer Chiefs, uSteve Komphela, njengokwenza isiqiniseko sokuthi iqembu lizibekisela indawo kuma-semi final eMTN 8 uma sebetholene phezulu neSuperSport United ngoMgqibelo.
Lo mdlalo ongomunye wemine yama-quarterfinal kule mpelasonto alo mqhudelwano, uzogijinywa eMoses Mabhida Stadium, eThekwini ngo-8.15 ebusuku. Amathikithi emidlalo aseyatholakala eTicketPro.
Ngesizini edlule iChiefs iphume ekuseni kwiMTN 8 ishaywa ngomakoti iCape Town City ngo 1-0 eKapa.
Ngesizini yokuqala kaKomphela engumqeqeshi waMakhosi uhambe wafika kowamanqamu, bahlulwa yi-Ajax Cape Town ngo 1-0 ePort Elizabeth.
Imiphumela efuze lena iyona eyenze ukuthi kuphele amasizini amabili uKomphela enganqobanga lutho neChiefs. Lokhu kumfakela ingcindezi yokuthi lena ka-2017/2018 ayiqale ngokuthola umphumela ozoshiya abalandeli nethemba lokuthi kukhona abangakunqoba ekupheleni kwesizini.
Nokho uma kuya ngokomgadli we-United, uJeremy Brockie, uzokonakala umcimbi waMakhosi.
Ezinyangeni ezimbili ezedlule, uBrockie nozakwabo kade beseMoses Mabhida lapho beshiye omakhelwane beChiefs, i-Orlando Pirates, bekhala. Amatsatsantsa a Pitori, abhaxabule
iBucs ngo 4-1 kowamanqamu weNedbank Cup okungenye yezinto ezidalele amazinyo abushelelezi obengumqeqeshi uKjell Jonevret. “Kumnandi khona ukuthi sizovula ngeqembu elikhulu njengeChiefs. Ngingakusho kugcwale umlomo ukuthi nozakwethu siwubheke ngabomvu umdlalo. Umqeqeshi u-Eric (Tinkler) ufikile wazama ukufaka owakhe umsebenzi kulesi sikhathi esibe naso. Kodwa engikuthandayo ukuthi indlela yakhe yokwenza izinto icishe ifane nekaStuart (Baxter obengumqeqeshi). ICape Town City abekuyona ngesizini edlule ishaye amagoli amaningi, nami ngizimisele ngokuthi ngimshayele amagoli,” kusho uBrockie. Kumasizini edlule i-United inqobe iNedbank Cup kabili kulandelana neTelkom Knockout ngo-2014. Isayinqobe kanye iMTN 8, eyayigcina ngo-2004 isabizwa ngeSAA Supa 8. ISuperSport iyona ekhiphe Amakhosi kwiNedbank Cup ngesizini edlule. “Sizinqobile izicoco kumasizini edlule kodwa lesi yisona esikade sasigcina. Leli yithuba lethu. Siyazi ukuthi kuzobe kugcwele enkundleni. Ngingabathembisa abalandeli ibhola elihehayo nokuthi sizobe sibheke ukuthi sinqobe,” kusho uBrockie.