Uzothathelwa izinyathelo uManana
UMENGAMELI Jacob Zuma usenxuse abezomthetho ukuthi bangananazi ukubopha labo abahlukumeza abesifazane nezingane noma kuthiwa banaziphi izikhundla.
UZuma uthe amacala athinta ukuhlukunyezwa kwabesifazane bawabeke eqhulwini lwamacala abucayi.
“Noma ngubani noma kuthiwa unasiphi isikhundla kumele aboshwe uma ehlukumeza abesifazane. Abenza lawa macala kumele babhekane nengalo yomthetho kungananazwa,” kusho uZuma.
Ukusho lokhu izolo emgubheni woSuku lwabesiFazane eGaleshewe, eKimberley, eNorthern Cape.
Yize engazange aligagule igama lePhini likaNgqongqoshe wezeMfundo uMnuz Mduduzi Manana osolwa ngecala lokushaya abesifazane ababili endaweni yobumnandi eCubana ngeSonto ezintatha kodwa uZuma, uthe abesifazane kudingeka bavikelwe kulabo ababahlukumezayo.
“Bangu-541 abagwetshelwe amacala abucayi athinta ukuhlukunyezwa kwabesifazane onyakeni odlule wezimali. Kuningi okusamele kwenziwe ukulwa nesihlava sokuhlukunyezwa kwabesifazane,” kusho uZuma.
UNgqongqoshe wamaPhoyisa uMnuz Fikile Mbalula, uthe uManana uzovela enkantolo kungakapheli isonto ngoba ngeke abalekele kwelinye izwe futhi kufanele axhumane namaphoyisa.
“Idokodo selidluliselwe ophikweni lwezokushushisa futhi silindele ukuthi avele enkantolo kuleli sonto. Lokhu kuyakhombisa ukuthi umthetho uyasebenza,” kusho uMbalula.
Uthe lolu phiko yilona oluzonquma ukuthi uboshwa nini uManana wathi uphenyo luyaqhubeka.
“Asifuni ukujaha amaphoyisa ngoba leli cala libhekwe umphakathi.”
UManana usolwa ngokushaya abesifazane ababili, ehamba nabangani bakhe ngoba omunye wabo embize ngesitabane. Akazange alibeke ePhalamende njengoba bekuvotelwa uZuma ukuthi ehle esikhundleni noma aqhubeke. Uxolisile kulaba besifazane nasemndenini yabo. UNgqongqoshe wezabesiFazane, uNkk Susan Shabangu, uthe uManana kumele abhekane nengalo yomthetho.
“Ngizolulandela lolu daba, siyaxolisa kwabesifazane abahlukumezile. Sizobaseka, sizobavakashela ngoba bahlazekile behlaselwa endaweni yokujabula. Amaphoyisa awamthathele izinyathelo, akungagcini kuphela ngokuboshwa ngoba baningi ababoshwayo, asifuni kuthathe izinyanga kuphenywa ngoba leli cala licacile,” kusho uNkk Shabangu.
UMengameli wophiko lwabesifazane kwi-ANC, uNksz Bathabile Dlamini, uxwayise abesilisa kuleli qembu ukuthi uma befuna ukujutshelwa ezikhundleni eziphezulu kumele batshengise amava abo okweseka abesifazane.
“Sanquma ukuthi sizokweseka bonke abagilwa bezigameko zokuhlukunyezwa, yingakho sizokweseka abesifazane abahlukumezekile. Umthetho awuthathe indawo yawo kulabo abahlukumeza abesifazane,” kusho uNksz Dlamini.