Bathweswe iziqu zokuphatha imali yomasipala
UNGQONGQOSHE weziMali KwaZulu-Natal, uNkk Belinda Scott, uthwese abasebenzi abangu-25 bomasipala abehlukene iziqu ezizobasiza ukuphatha kahle imali yemikhandlu.
Kulo mcimbi obuseGreyville, eThekwini ngoLwesibili, uNkk Scott uphinde wethula ngokusemthethweni uhlelo analo nabebhange i-Absa nabasenyuvesi yaseWestern Cape.
“Sifuna abasebenzi bomasipala basebenzise imali ngendlela ukuze sithole umbiko womcwaningi mabhuku ongenawo ugcobho. Abasebenzi baqale ukuqeqeshwa ngonyaka odlule enyuvesi yaseWestern Cape bexhaswa yibhange i-Absa. Lobu budlelwano siyazi buzosiza ukuthi siqede ukumoshwa kwemali,” kusho uNkk Scott.
Uthe ujwayele ukuxoxisana nozakwabo uNkk Nomusa Dube-Ncube ngezinhlelo zokuthuthukisa amakhono abasebenzi bomasipala ukuze abantu bathole izidingo ngesikhathi.
“Sibonile ukuthi abasebenzi bomasipala baswele amakhono okuyiphatha. Ukuqeqeshwa kwabasebenzi kusho ukuthi abaphethe imali bazoyisebenzisa ngendlela. Sizosebenzisana namabhange namanyuvesi ukuze sithuthukise amakhono abasebenzi,” kusho uNkk Scott.
UMnuz Allan Roman wenyuvesi yaseWestern Cape uthe ukuqeqeshwa kwabasebenzi bomasipala kwenzelwa ukuthuthukisa amakhono abo ukuze imali izosetshenziselwa ukuletha izidingo zabo.
UMnuz Dante Mashile obhekelele ezokukhangisa nokuxhumana e-Absa, KwaZulu-Natal, uthe bakubone kufanele ukuthi bathuthukise amakhono abantu abasebenza ngemali komasipala.
“Uma omasipala bethola umbiko womcwaningi mabhuku onogcobho, kungaziwa ukuthi imali ishonephi kusho ukuthi kunezidingo abantu abangazitholi. Sifuna isenti nesenti eliphuma komasipala baKwaZulu-Natal kwaziwe ukuthi lenzeni. Sifuna abantu bathole izidingo ngesikhathi futhi nemali isebenze ngendlela efanele komasipala,” kusho uMashile.