Zithungatha amaqembu ezagqama kuBafana
IZILOMO zabadlali abazakhele igama kuBafana Bafana eminyakeni eyedlule zisathungatha amaqembu amasha.
Isikhathi esiningi iwindi lokudayiselana ngabadlali eNingizimu Afrika lihlale lithule kodwa kulokhu limatasa njengoba abadlali besayina ngapha nangapha.
Phakathi kwamaqembu ahlomule ngabadlali abanesipiliyoni singabala iBidvest Wits, Kaizer Chiefs, Orlando Pirates, Mamelodi Sundowns, Cape Town City, Bloemfontein Celtic, Chippa United, AmaZulu neSuperSport United.
IWits isayinise uThato Tlhone, Kabelo Kodisang, Steven “Schillo” Pienaar noDaylon Claasen kwathi Amakhosi ahlabana ngoBhongolwethu Jayiya, Dumisani Zuma, Philani Zulu noTeenage Hadebe.
EZimnyama zithole uMusa Nyatama, Thamsanqa Sangweni, Wayne Sandilands noChristian Obiozor. ICity efike yagila izimanga ngesizini yokuqala nayo ayizange isale emaqenjini asayinise abadlali abanamava. Isayinise uTeko Modise, Ayanda Patosi noLyle Lakay.
ICeltic iqinise iqembu layo ngoNdumiso Mabena, Sipho Jembula, Lucky Baloyi noRoggert Nyundu kwathi iChippa United yalanda uBrighton Mhlongo, Samuel Julies, Mark Mayambela, Abel Mabaso, Kurt Lentjies noMahlatse Madukubela.
Yize kunjalo kodwa izilomo zabadlali abaduma kuBafana basathungatha amaqembu. Phakathi kwabadlali abangenawo amaqembu singabala uKagisho “KG” Dikgacoi, Thanduyise “Gonondo” Khuboni noBryce “Snege” Moon.
Bobathathu bagqame kwiBafana eminyakeni eyedlule. UDikgacoi noKhuboni babe khona ngesikhathi elakuleli lidlala kwiNdebe yoMhlaba eMzansi ngo-2010 kanti uMoon wayeyibamba kwi-Africa Cup of Nations (Afcon) eGhana ngo-2008.
Ngesizini edlule uDikgacoi ubegijima kwiLamontville Golden Arrows kanti uKhuboni ubeyibamba kwiHighlands Park njengoba uMoon ebedlala kwiMaritzburg United. Inkontileka kaKG kayivuselelwanga kuBafana Bes’thende. UKhuboni yena uphelelwe yinkontileka neHighlands Park egcine igawulwe yizembe kwi-Absa Premiership. UMoon naye eyakhe iphelile kwiTeam of Choice futhi yangavuselelwa.
Laba badlali ngeke kubaphazamise ukuvalwa kwewindi kwazise awekho amaqembu abanezinkontileka nawo okubanika igunya lokuthi bangasayina noma kuliphi abalithandayo noma nini.
Abanye abadlali abasathungatha amaqembu nguCollins Mbesuma ophethe irekhodi lokushaya amagoli amaningi ngesizini eyodwa ye-Absa Premiership noPhilani Shange.