Umndeni ucikwa ngabahlekisa ngoTsekeleke
KUZOHLONISHWA oDJ basezindaweni zobumnandi nabasemsakazweni emiklomelweni emisha amaSouth African DJ Awards, ethulwe izolo eLangeni Hotel, eThekwini.
Omunye wabasunguli bemiklomelo, uSiyanda Makhanya, uthe bafuna ukuqala ngamandla yingakho bethe imiklomelo ivuleleke kwabaseNingizimu Afrika yonke hhayi eThekwini kuphela.
Uthe kungalesi sizathu besebenza nabantu abanamava ukuhlanganisa umcimbi njengoSiyanda Mwandla ongumdidiyeli wamaCrown Gospel Music Awards nabanye.
Omunye wabasunguli bemiklomelo, uNonny Siphika, uthe bazoba neminxa engu-22. “Sibone ukuthi oDJ bayanakwa phesheya kodwa hhayi kuleli. Uma ubuka uBlack Coffee wathola indondo e-Ibiza,” kusho uNonny.
Uthe inhloso yemiklomelo akusikho ukuhlonipha abenza kahle kuphela kodwa kuwukubamaketha nokunaka abasafufusa.
Ngenyanga ezayo kuzovuleleka ukuthi abantu bavotele abantu abacabanga ukuthi bafanelwe wukuqokwa. Emunxeni ngamunye kuzoqokwa abahlanu.
Uthe uma sekuvotiwe kuzosala abahlanu nabo abazovotelwa wumphakathi ukuze kukhethwe onqobile. NgoNovemba uNonny uthe bazoya emadolobheni amakhulu okuyiseGoli, eKapa naseThekwini beqwashisa abantu ngomcimbi.
Umcimbi uzoba ngoDisemba 23 eThekwini. Uthe basaxoxa neNkosi Albert Luthuli Convention Centre ukuze umcimbi ube khona. UMNDENI wobengumculi wekwaito oshone ngeledlule, u-Anthony “Tsekeleke” Motaung (49), uthi kuphoqeleke ukuthi ungene ugamanxe emaphaketheni ukuze uthole ibhokisi lokumngcwaba elizomenela kwazise ubemkhulu.
Okhulumela umndeni uMongameli “Chief” Mjamba, uthe bebedinga ibhokisi elikhulu ukuze enele kahle uTsekeleke oshone emva kokuxinwa wushukela.
“Liyamlingana futhi sizomngcwaba kahle. Ngeke alothiswe. Likahle akusilo elejwayelekile, likhulu kodwa hhayi kangako,” kusho uChief, eqhuba ethi: “Lithe xaxa ngemali kodwa uMasipala waseKurhuleni usixhasile.”
Ezinkundleni zokuxhumana kunombhalo osabalele lapho kubuzwa khona ukuthi lizophathwa kanjani ibhokisi lakhe njengoba emkhulu.
Uthe kuyadabukisa ukuthi abantu bayenza inhlekisa indaba yokushona kukaTsekeleke. Uthe okubuhlungu wukuthi ngabantu abamnyama abenza lokhu.
“Ezinye izinhlanga ziyahloniphana. UNkulunkulu wakha umuntu ngomfanekiso wakhe. Kusho ukuthi uNkulunkulu unjena. Bathuka uNkulunkulu,” kusho uChief.
Utuse kakhulu uMasipala waseKurhuleni ngokubaxhasa kusukela ngenkonzo yesikhumbuzo ngoLwesithathu.
“Basinikeze ihholo iRabasotho Hall balihlobisa ngaphandle kokuthi sikhokhe. Basinikeze namanzi enele wonke umuntu.”
Uthe phakathi kwabebekhona kubalwa abanye babanikazi beKalawa Jazmee uMjokes, Spikiri noMahoota, Jakarumba, Alaska nabanye.
UTsekeleke uzofihlwa kusasa eMooifontein Cemetery ngemuva kwenkonzo ezoba seSam Hlalele Hall, eTembisa.