I-VW Polo 1.0 R-Line inokuhlukile
IMOTO: VOLKSWAGEN POLO 1.0 TSI R-LINE
YINI le, yiPolo GTi? Yiwona mbuzo abaningi abebengibuza wona ngesikhathi bebona iVW Polo 1.0 R-Line ebengiyivivinya ngeledlule.
Okubenza babuze kanje yingoba zicishe zifane indlela ezibukeka ngayo. Abaningi nje ungabadida ngokuthi ufake iGTi ngemuva. Bancane abayobona ukuthi le inenqawe eyodwa ekubeni iGTi linezimbili.
Omunye umehluko usungaba uma uyifake emgwaqweni uthi ayingene ejubaneni.
Le Polo inenjini engu-1.0 TSI kanti ikhahlela amandla angu81kW netorque engu-200Nm. Ukufika ejubaneni lika-100km/h kuyithatha imuzuzwana engu-9.3 kanti ijubane layo elikhulu ngu197km/h.
KwaVW bathi ngebanga lika100km iphuza amalitha angu-4.4 kaphethroli okuyinto engihluleke ngancama ukufika kuyo njengoba ibidla ngaphezulu kuka-6 litre ngo100km. Yize kunjalo kodwa iyonga. Wagcina nini nje ukufaka uR50 kwenzeke umehluko kuphethroli?
Le njini igaxwe u-gearbox othembekile futhi oshintsha kamnandi kwesinye isikhathi kungezwakali, oyi-7 speed DSG.
Le njini incane impela kodwa angikhali ngalutho kuyo ngoba emgwaqeni le moto iyagijima. Izintaba izishaya ingazweli.
KwaVW bathi izinjini ezincane yizona abazozisebenzisa ezimotweni zabo zangomuso.
Ngaphandle nje kokufika nenjini entsha kodwa lePolo iyiPolo lokuqala ukufika neRLine Package. IR-Line Package ishintsha indlela ebukeka ngayo ngaphandle iyenze ibe sporty.
Phakathi kwezinto ezishintshile kubalwa uphawu lweR-Line kugrille ngaphambili, ubhampa ngemuva nangaphambili, ispoiler ngemuva esifana nombala wemoto, ebengihamba ngayo nje ibibomvu, amasondo ahlobe ngamarimu angu-17 inch Serron alloy.
Ngaphakathi ixhuma iBluetooth, UBS, iPhone/ iPod, ikwazi ukuzwa uma umshayeli esekhathele, isiteringi esinamabhathini nokunye.
Ongazifakela wena kwebengihamba ngayo obekukhona yi-screen esingu-5.8 inch, App Connect, iLight and Vision package ehlanganisa ama-wiper azishayayo uma lina namalambu azikhanyisayo uma kumnyama, cruise control, panoramic sunroof, ikhamera ekukhombisa ingemuva uhlehla, ama-sensor akusiza uma upaka, amalambu eLED. Inani 1.0 TSI Polo R-line R290 200 Iphuma ne-service plan yeminyaka emithathu noma ibanga lika-45 000km, warranty yeminyaka emithathu noma ibanga lika-120 000km.