USjava ujabulise umlandeli ngobucwebe
USHAQEKILE umfanyana oneminyaka eyisikhombisa waseMgungundlovu ongumlandeli wesihlabani somculi uSjava emupha ubucwebe.
USethu Zakwe ohlala eMbali (J), eMgungundlovu, kufezeke iphupho lakhe lokubonana nalo mculi amkhonze kakhulu, kwenzeka nabengakulindele njengoba evele wakhipha umgexo abewugqokile wamupha wona.
Lokhu kwenzeke ngoMgqibelo ebusuku kwi-Pietermaritzburg Jazz ebise-Royal Show Grounds.
“Ngimangele futhi ngijabula kakhulu, uSjava engipha i-chain lakhe (eqonde umgexo) abeligqokile. Bengisazijabulela ukuthi kufezeka iphupho lami lokuhlangana naye okokuqala, ngishuthe naye, ngabona esengipha i-chain. Angikwazi nokuchaza injabulo yami,” kusho uSethu emamatheka.
Lo mfanyana ofunda uGrade 1, eLittle Ambassador College, uthe ayikho ingoma kaSjava angayazi.
Uthe uyamthanda kakhulu lo mculi nokwenze wacela kunina nakubabekazi wakhe ukuba behambe naye baye kulo mcimbi.
Emuva kokuphiwa lesi sipho, babe sebehamba, bangabe besababukela abanye abaculi abalandelile ngoba inhloso kaSethu bekuwukuzobona uSjava. Lo mfanyana ubelokhu ecula izingoma zikaSjava
noma esezihambela, ebambe umgexo wakho abewufake entanyeni, kucaca ukuthi uyigugu.
USjava uthe wenze lokhu ukuze agqugquzele umlandeli wakhe.
“Ngiyakhumbula ngisewumfana omncane njengaye ngangijwayele ukuhambela imicimbi efana nalena, ngiyazi ukuthi kuyigugu elingakanani ukuba umlandeni womculi othize. Ngangiwumlandeli kaMandoza ngisemncane. Ngifuna ukumkhuthaza njengoba ngimnikeze i-chain lami,” kusho uSjava.
Ebuzwa ngokuthi uwumalini lo mgexo, uthe lokho akubalulekile kodwa okusemqoka ukuba akhumbule njalo ukuthi walinikezwa uyena.
Ebuzwa uSethu ukuthi ufuna ukuba yini uma esekhulile uthe ufuna ukuba ingane kaSjava, esho ehleka.