Ugxile emahlayeni epolitiki
AKABAPHOXANGA abalandeli bakhe uTrevor Noah oqhulule amahlaya abegxile kwezepolitiki ngoMgqibelo eJoburg Theatre.
Ubuye kuleli ukuzokhumbuza abalandeli bakhe ukuthi udume ngani emuva kweminyaka emibili ahamba.
UTrevor ungumethuli wohlelo lwamahlaya olukhulu emhlabeni iThe
eNew York. Amahlaya kaTrevor abegxile kakhulu kokwenzeka ePhalamende, ethinta umholi we-EFF uJulius Malema noMengameli uJacob Zuma.
Abakade bewuhambele bekucaca ukuthi bathokozile.
Kwelinye lamahlaya akhe uTrevor uthe ayimphathi kahle indlela umholi we-EFF abukeka ngayo ngemuva kokuncipha.
Uthe njengoba esehlile nje emzimbeni uma esekhuluma akusezwakali kahle ngenxa yokuthi usemncane.
Uqhube wathi umzimba ayenawo wawuhambisana kahle nezwi lakhe.
Okunye akushilo kwashiya izethameli zijabulile yiziteleka ezithe chithi saka zokuchitha uMengameli ezihlelwa yi-DA.
UTrevor uthe abamhlophe abayeke ukuteleka ngoba abakwazi.
“Uma kutelekwa kudingeka kube nomsindo kubonakale ukuthi abantu banomsindo lokhu abakutelekelayo bafuna kulungiswe ngokushesha. Kodwa engikubona ezitelekeni zabamhlophe zokukhipha uZuma izalukazi ezintathu zimile zikhathele zithi, uZuma Akahambe,” kusho uTrevor.
Uvale ngokuhlekisa ngencwadi kaBonang, yize engandanga namaningi kodwa uthe akafuni abantu bakhulume isingisi sikaBonang. Ubonge abantu bakuleli ngokumxhasa. Uthe ula ekhona ngenxa yoxhaso lwabalandeli bakhe.
Phakathi kosaziwayo abebekhona kubalwa uProverb, Unathi Msengana, Minnie Dlamini nomyeni wakhe uQuinton Jones, Romeo Kumalo, Lira, Zenande Mfeyane nabanye.
Izolo, uTrevor ubehlekisa abantu eThekwini.