Uvalo kutholwa izidumbu ehostela
AMAPHOYISA aKwaMashu aphenya ngokubulawa kwamadoda amabili okutholwe izidumbu zawo ehostela KwaMashu zinamanxeba okudutshulwa ngoMgqibelo ebusuku.
Abesilisa ababili abaneminyaka engu-22 no-35, amagama abo angakadalulwa kuze kube kwaziswa umndeni, batholwe benamanxeba okudutshulwa.
Kuthiwa ukutholwa kwezidumbu sekuqubule uvalo kwabahlala ehostela njengoba kungacaci ukuthi kungani bebulewe.
Njengoba kutholwe izidumbu ehostela izolo, eSiyanda kutholwe indoda engaziwa ibulewe. Isidumbu sayo besiphakathi kwemizi yabantu.
Okhulumela amaphoyisa KwaZuluNatal, uColonel Thembeka Mbhele, uthe kusaphenywa imbangela yokubulawa kwabo.
“Amaphoyisa aKwaMashu aphenya amacala amathathu okubulala. Abesilisa ababili batholwe bebulewe KwaMashu omunye watholwa eSiyanda. Bonke badutshuliwe. Ayaziwa imbangela yokubulawa kwabo, uphenyo ngalezi zigameko luyaqhubeka,” kusho uColonel Mbhele.
Amaphoyisa acela usizo emphakathini ongaba nolwazi ngokubulawa kwabesilisa ukuba axhumane namaphoyisa aKwaMashu noma afonele inombolo yamahhala yokubika ngezehlakalo zobugebengu u-08600 10111.
Khonamanjalo, kuthiwa kuqhume izibhamu kwaze kwasa eNanda ngoLwesihlanu nangoMgqibelo ebusuku. Bekukade kufihlwa abathathu ababulawa ngesikhathi bedubulana namaphoyisa emgwaqweni uN2 ngoLwesihlanu olwedlule.
Kuthiwa ababili bafihlwe ngoMgqibelo oyedwa wafihlwa izolo.
Kuthiwa ngesikhathi amaphoyisa eyobheka isimo ahlangabezana nembibizane izimoto zawo zashaywa ngamatshe.
UColonel Mbhele ukuqinisekisile ukuthi kukhona izimoto zabo ezashaywa ngamatshe ziyobheka isimo kule ndawo kodwa wathi amaphoyisa agcina esidambisile isimo sabuyela kwesijwayelekile.
NgoLwesihlanu olwedlule kwaphazamiseka ukuhamba kwezimoto kwaba nesiminyaminya emgwaqweni uN2 ngemuva kokudubulana kwamaphoyisa nababesolwa ngokuthi babeyobamba inkunzi.