Bebelungiselela uMkhosi woMhlanga
IZINTOMBI nto bezilungiselela uMkhosi woMhlanga emcimbini kaNomkhubulwane obuKwaMaFunze, ngaphandle kwaseMgungundlovu ngoMgqibelo.
Izintombi ezilinganiselwa ku-4 000 ezivela kwa-Vulindlela, Mkhambathini naseNadi zihloliwe zenza namanye amalungiselelo okugcina okuba zihlanganyele eMkhosini woMhlanga.
UMnuz Mhlonishwa Ngcobo, umhleli womcimbi, uthe izintombi sezikulungele ukuya eMhlangeni.
“Umcimbi kuba ngowokugcina olungiselela izintombi ukuba ziye eMhlangeni. Sigculisekile njengoba izingane zifike ngobuningi bazo. Zingaphezu kuka-4 000 izintombi ezifikile. Izintombi zikubheke ngabomvu ukuya emkhosini. Zonke ezihloliwe kutholwe ukuthi kuhamba kahle kuzo. Okuhle ngalokhu wukuthi zonke izingane ezifikile ziyazithandela zona, ayikho ephoqiwe ukuba ihlolwe,” kusho uNgcobo.
Uthe kuNomkhubulwane kuba nezigaba eziningi abazenzayo ukulungiselela uMhlanga.
“NgeSonto eledlule (Agasti 6), izintombi zihlabe izimbuzi ezimbili zibika ngalo mcimbi kaNomkhubulwane. Ziye entabeni zenza umkhuleko ofanele. Kule mpelasonto kusukela ngoLwesihlanu bebenohlelo lokuzilungiselela. Namhlanje nje (izolo) izintombi bezihlwayela imbewu,” kusho uNgcobo.
Izintombi zithola nethuba lokucula nokugida ukuze zilungiselele ukuyoveza ikhono lazo eMhlangeni uma sezibhekene nezinye zakwezinye izigodi.
Imvunulo ehlukahlukene nayo ayisali ngaphandle njengoba izintombi zisuke zikhipha unyawo.
Ngokohlelo loMnyango wezobuCiko namaSiko KwaZulu-Natal umcimbi woMhlanga uzoba esigodlweni KwaNongoma seSilo uGoodwill Zwelithini ngoSepthemba 8 kuya ku-10.