Izitabane zicasulwe yinkulumo kaNala
ZIVINJELWE ukuba zingene esontweni likaDkt HQ Nala izitabane ezivela ezinhlanganweni ezihlukahlukene eThekwini, izolo.
Lezi zitabane ebeziphethe izingqwembe ezithi uNala makayeke ukudukisa abantu, zithe zizoludlulisela enhlanganweni evikela amalungelo abantu nasenkantolo yezokuingana udaba lwenkulumo kaNala yokuthi ulapha ubutabane.
Izitabane ebezifuna ukukhuluma noNala ziphoqeleke ukuthi ziqhinqe ngaphandle kwesonto lakhe, iNala Mandate elikuMagwaza Maphalala (Gale Street).
NgoLwesihlanu, oludlule uNala utshele abantu ukuthi welapha ubutabane, ingculazi futhi uvusa nabantu abafile ngesikhathi eqopha i-albhamu yakhe yesithupha yeTehillah Song.
UMnuz Sibongiseni Khumalo weKZN LGBTI Centre okuyisikhungo esiqhakambisa amalungelo ezitabane, uthe bebefuna ukuxoxisana noNala kodwa bavinjwa esangweni ngonogada besonto lakhe.
“Sithi uDkt Nala akayeke ukubhebhezela inkoleloze yokuthi ubutabane buyalashwa. Ukuba yisitabane akusona isifo. Sinezingqinamba eziningi ezweni zokuhlaselwa kwezitabane nokubulawa kwazo ngabantu abazicwasayo. Sifuna ayiyeke le nto yakhe,” kusho uKhumalo.
Uthe uDkt Nala akakhombisi ukuba ngumholi oqotho ngoba uthi ulapha ingculazi, ulapha ubutabane futhi uvusa nabafile.
“Ukuvinjwa kwethu ukuthi sikhulume naye kusho ukuthi sizoya enhlanganweni yamalungelo abantu nasenkantolo ngoba sifuna ayeke ukuthi ubutabane buyisifo. Njengoba siyizitabane asiguli ndawo, sidalwe nguNkulunkulu ukuthi sibe njena,” kusho uKhumalo.
Ubuze ukuthi kungani uNala engakhulekeli amaphara ukuthi ayeke iwunga, akhulekele ukuthi kupheze ukubulawa kwabanebala elimhlophe, ukudlwengulwa kwabesifazane, ukubulawa kwabantu bese becwiywa izitho zomzimba noxolo ezweni.
UMnuz Mfanafuthi Mvubu oyisitabane esizelwe kabusha futhi ozichaze njengomntwana kaNkulunkulu, uthe kumphatha kabi ukuzwa uNala ethi uyazelapha izitabane ngoba lokho kudukisa umphakathi.
UNksz Hlengiwe Buthelezi ongumsunguli weKZN LGBT Recreation, uthe uNala akafuni ukubanika amanzi ngoba uyazi ukuthi ubutabane abulona idimoni noma isifo.
“Iqiniso wukuthi uNala wenza ibhizinisi njengoba ethi ulapha ubutabane ngoba amanzi okuthiwa ayelapha adayiswa ngo-R15,”kusho uNksz Buthelezi.
UNkk Kim Lithgow weSame Love Toti, uthe inhloso yabo wukusiza imindeni enezingane eziyizitabane ukuthi iqonde ukuthi ubutabane abubona isifo njengoba neWorld Health Organisation ikugcizelela lokhu.
Esitatimendeni esithunyelelwe Isolezwe wuNala, uthe unelungelo lokusho umbono wakhe futhi akakholelwa ukuthi uNkulunkulu wadala izitabane. Uthe izitabane zemukelekile uma zizosebenzisa iFaith Water yakhe ukuze zilapheke.
“Uma befuna ukungiyisa enkantolo makube njalo ngeke kushintshe ukuthi izitabane azidingeki eNala Mandate. Abeze bazophuza iFaith Water ukuze kuphele ubutabane,” kusho uNala.