Izitha zami zingifuna ngifile: Zuma
UMENGAMELI Jacob Zuma izolo uphumele obala ngokudliswa kwakhe ushevu wathi uyazi ukuthi izitha zakhe zimfuna kobandayo ngoba nakhu ebuyisela iNingizimu Afrika kubangani bayo beqiniso okungamazwe akholelwa emfundisweni yamaKhomanisi.
Ekhuluma enkundleni yezemidlalo oPhongolo izolo, uZuma uthe isono sakhe ukuthi asondelane namazwe akholelwa emfundisweni yamaKhomanisi.
“Mina ngike ngadliswa uphoyizeni emini kwabha ngiphesheya kwezilwandle kodwa ngasinda. Phezu kwalokho ngiphilisa okwenyoni ngenxa yezitha ezingifuna ngifile,” kusho uZuma.
Uthe akazi ukuthi inzondo yani lena engaka ebhekiswe kuye ukuthi usengaze afe.
Yize uZuma engazange asho ukuthi wadliswa ngubani ushevu kodwa kuke kwabikwa eminyakeni edlule ukuthi omunye wamakhosikazi akhe uNkk Nompumelelo MaNtuli Zuma wayesoleka kulokhu njengoba kuvela ukuthi lo phoyizeni wangena kuyena ngesikhathi benaye phesheya kwezilwandle. Ushevu egazini likaZuma waqinisekiswa nangodokotela base-US nase-Russia.
UNkk MaNtuli Zuma kuthiwa wakhonjwa indlela eNkandla ngezinsolo zokuthi udlise uZuma ushevu kodwa akucaci ukuthi ubudlelwano babo bunjani njengamanje.
UZuma uthe ngesikhathi sobandlululo amazwe aseNtshonalanga abengayifuni i-ANC njengoba kade eseka uhulumeni wengcindezelo.
“OwayenguMengameli we-ANC uMnuz Oliver Tambo waya kuwona amazwe aseNtshonalanga eyowacela ukuthi awaseke i-ANC ngezikhali kodwa enqaba. UKhongolose uze wasizwa ngamazwe lawo akholelwa kwimfundiso yamaKhomanisi okuyiwo asukumela phezulu athi aqeqesha uMkhonto weSizwe akhipha nezikhali zawo ngaphandle kokufuna imali,” kusho uZuma.
Uthe kuthe yena uma esebuyisela izwe kubangani balo bangempela ngokuthi ajoyine i-Brics wabe useyinyathele emsileni kumazwe aseNtshonalanga.
“Njengoba ngijahwa kangaka, labo abangihubhayo babika emazweni aseNtshonalanga okubuhlungu ukuthi sekukhona abanye esithi sinabo, asebejoyine izitha,” kusho uZuma.
Uthe amazwe aseNtsholanga amfuna ephumile esikhundleni khona kuzongena umuntu ozodansela isiginci sawo, aqede ubuhlobo namazwe amaKhomanisi.
“Ngizokwenza isibonelo ngeLibya, leliya lizwe beliphila kahle ngaphansi komholi walo uColonel Muammar Gaddafi. Kwasuka elinye izwe laseNtshonalanga lathi uGaddafi ungumbulali kumele akhishwe emandleni aphinde abulawe. Manje iLibya ebisiza amanye amazwe lapha e-Afrika ngenxa yomnotho wayo isiphethwe yizigebengu ezibika phesheya kwezilwandle,” kusho uZuma,
Unxuse amalungu e-ANC namadlelandawonye ukuba abumbane ukuze izitha zingakwazi ukungena phakathi kwabo.
Uthe i-ANC iyisikhondlakhondla asikho isitha esingayinqoba, wengeza ngokuthi iyona kuphela engazibulala ngokuvumela izitha phakathi.