Umbiko ngo-R1.5m okuthiwa ufunwa abeseka uRamaphosa
SEKUVELE umbiko oveza ukuthi abeseka iPhini likaMengameli uMnuz Cyril Ramaphosa bafuna u-R1.5 million ukuqhuba umkhankaso wokumenza uMengameli.
Lo mbiko uvele emuva kwevoti eliyimfihlo elingaphumelelanga lokususa uMengameli Jacob Zuma esikhundleni sakhe ngesonto elidlule.
Ikhophi yombiko ethunyelelwe i-Independent Newspapers iveza ukuthi abantu abahola umkhankaso ngoMnuz Steyn Speed ongumeluleki kaRamaphosa, Enoch Godongwana oyiNhloko yezomnotho kwi-ANC, Pat Govender owayeyisikhulu esiphezulu seNational Prosecuting Authority noNksz Marion Sparg owayeyisosha loMkhonto weSizwe elabhalela uMengameli Jacob Zuma incwadi limcela ukuba esule esikhundleni ngo-2014.
Kuthiwa ilungu lesigungu esiphezulu se-ANC, uMnuz Philly Mapulane, yilona elinguSihlalo womkhankaso kaRamaphosa.
UGodongwana uthe ayikho indaba yalo mbiko futhi kukhona abangcolisa amagama abo ngaphambi kwengqungquthela yokukhetha ubuholi ezoba ngoDisemba.
Kuthiwa umengameli Zuma ufuna owayengunkosikazi wakhe uDkt Nkosazana Dlamini Zuma angene esikhundleni sakhe.
UMapulane ukuphikile ukuthi unguSihlalo womkhankaso kaRamaphosa wathi yena uhambisana nethimba elithi iPhini likaMengameli we-ANC kufanele libe ngumengameli wale nhlangano njengoba kujwayele ukwenzeka kanjalo.
“Selokhu kwaba khona isikhundla sePhini likaMengameli yilona elingena esikhundleni sikamengameli. Akukaze kushintshe, kodwa-ke awulona iqiniso loyo mbiko,” kusho uMapulane.
UMnuz Brian Dube okhulumela uNgqongqoshe wezobuNhloli uMnuz David mahlobo uwuchithile umbiko wathi unamaphutha amaningi akukwazi ukuthi ubungabhalwa yithimba lezinhloli.