Kugqekezwe kwebiwa imininingwane ebucayi
ZIYANDA izehlakalo zokugqekezwa kwamahhovisi ezinhlangano ezizimele kwebiwe izinsiza ezinemininingwane ebucayi. Kwesisanda kwenzeka kugqekezwe amahhovisi enhlangano ebhekelele ukuncintisana, iCompetition Commission.
UMnuz Sipho Ngwema, obhekelele ezokuxhumana kwiCompetition Commission, uthe ngoLwesibili kuntshontshwe amalaptop amabili aneminingwane yokuphenywa kwezinkampani ezivalela ezinye ngaphandle emkhakheni othile.
“Sivule icala emaphoyiseni, selifakwe ophikweni oluphenya amacala aphuthumayo yiDirectorate for Priority Crime Investigation olukoKlebe. Seziqinisiwe ezokuphepha emahhovisi ethu ukuze kuvinjwe ukwebiwa kwezinsizakusebenza,” kusho uNgwema.
Uthe umsebenzi wokuphenya izinkampani ezithintekayo uzoqhubeka yize kwebiwe izinsiza kusebenza.
“Umsebenzi wokuphenya ezinye izinkampani uzoqhubeka ngoba zonke izinsuku kufanele siqinisekise ukuthi kunokuncintisana okuhle phakathi kwezinkampani ezisebenza eNingizimu Afrika. Asikwazi ukusho okwamanje ukuthi amakhompyutha ebiwe aqukethe ulwazi lwaziphi izinkampani kwazise udaba luphentwe ngamaphoyisa.”
Oklebe bathe bekungakaboshwa muntu. Uphenyo luyaqhubeka.
Akuqali ukwebiwa kwezinsiza kusebenza ezikhungweni ezizimele. NgoMashi kwebiwe amakhompyutha ehhovisi loMphathi wamaJaji uChief Justice Mogoeng Mogoeng.
NgoEphreli kwebiwe amalaptop ehhovisi leSABC, ePhalamende.
Ekuqaleni kukaJulayi kwebiwe amakhompyutha ekomkhulu loKlebe ePitoli.
Ngawo futhi uJulayi kwebiwe ikeyboard emahhovisi asePhalamende.