I-ANCWL imuzwa ngaphakathi uDlamini Zuma
UMENGAMELI wophiko lwabesifazane lwe-ANC uthi lolu phiko ngeke lumeseke uNksz Baleka Mbete noNksz Lindiwe Sisulu embangweni wesikhundla sokuba umengameli we-ANC.
UNksz Bathabile Dlamini uthe uDkt Nkosazana Dlamini Zuma nguye kuphela okhethwe yilolu phiko ukuthi angenele umbango wokuba umengameli ngoDisemba futhi bazokweseka yena kuphela.
“Amandla ethu asemagatsheni kumele sikhethe abesifazane abathanda inqubekela phambili ngoba abesifazane abafani. Thina siyi-ANCWL ivoti lethu silinika uDkt Dlamini Zuma. Uma umthanda omunye umuntu ngeke sikubambe ngenkani, kodwa ungakwenzi lokho ucashe ngezembatho zethu,” kusho yena.
UNksz Dlamini ubesho lokhu ngesikhathi kunombuthano osamkhuleko walolu phiko obuseGermiston, Ekurhuleni, izolo.
Uthe uphiko lwabesifazane lweANC aludidekile, selusithathile isinqumo, noma ngubani osaqhubeka nokuthi uzongenela umbango wesikhundla sokuba umengameli ongowesifazane, angakwenza kodwa angalokothi azibize nge-ANCWL ngoba yona isithathe esokuthi izomelwa uDkt Dlamini Zuma.
UDkt Nkosazana Zuma obekhuluma kuwo lo mbuthano uthe abesifazane abangahlali ebudlelwaneni obunesibhaxu ngoba behlalele ukondliwa.
“Amantombazane awafunde ukuze akwazi ukuzimela. Maningi amathuba asevulekile manje, asifunde sibe namakhono. Okunye okumele sikwenze ukuthi sisebenze kakhulu njengoba sibheke okwethweni luka- 2019 sibuyise iGauteng, singathi siyiqembu elibusayo kodwa ikomkhulu lethu lingaphansi kukamasipala ophethwe yiqembu eliphikisayo,” kusho kanje.
Khonamanjalo uMnuz Cyril Ramaphosa obengekude kakhulu nalapho bekukhona uDkt Dlamini Zuma ethula isifundo sika-OR Tambo unxuse amalungu e-ANC ukuthi angayinikeli ezandleni zamasela.
Ubehambisana nelungu le-ANC eGauteng uMnuz Hope Papo, ilungu lePhalamende uMnuz Mondli Gungubele noNgqongqoshe wezeMfundo eGauteng uMnuz Panyaza Lesufi.