Badonswe ngendlebe abesifazane
KUGQUGQUZELWE abesifazane ukuthi bangazibukeli phansi futhi bakhumbule ukuthi bangabaholi kuzo zonke izinhlaka abakuzona.
Lokhu kushiwo emcimbini wenhlangano exhasa osomabhizinisi ngemali yokuthuthukisa izinkampani zabo iBusiness/Partners obuseLangeni Hotel, ngoLwesihlanu.
Umsakazi woKhozi FM uNongcebo McKenzie, uthe abesifazane akufanele bacabange ubuholi njengento ekude nabo ngoba bangabaholi emakhaya, emsebenzini nakwezinye izinhlaka abakuzo.
“Uma sicabanga ubuholi siye sicabange abantu abasiphethe kodwa iqiniso wukuthi abesifazane bangabaholi kuzo zonke izinhlaka abakuzona. Owesifazane ungumholi ekhaya ngoba nguye owaziyo ukuthi izingane kumele zigqokeni, nguye owaziyo ukuthi umndeni wakhe kufanele udleni futhi nguye owaziyo ukuthi umyeni wakhe kumele agqokeni njalo njalo,” kusho uNongcebo.
Uphinde waveza ukuthi uma abantu becabanga ukuthi bayokhunjulwa ngani bavamise ukubheka izinto ezinkulu ezifana nokwakha izikole nokuba nemali eningi.
“Umuntu ukhunjulwa ngemisebenzi yakhe emihle okubalwa ukufika ngesikhathi, ukwenza umsebenzi olindeleke kuwe ngesikhathi esifanele nokukhuluma kahle nabantu. Isikhathi esiningi uma sicabanga ngezinto abantu abazosikhumbula ngazo siye sicabange imisebenzi kaMandela kodwa abantu basikhumbula ngemisebenzi emihle esiyenzayo,” kusho uNongcebo.
UNkk Deshree Reddy ongowesifazane ogxile kwezokuthutha ngomkhumbi, udonse ngendlebe abesifazane ukuthi bangasabi ukusungula izinkampani zabo ngoba lokho kuzosiza ukuthuthukisa umnotho nokugqugquzela izingane ezisakhula.
Uveze ukuthi waqala ukusebenza njengomabhalane ehola u-R800 ngenyanga kwenye inkampani yaseChatsworth.
Emuva kwalokho wavolontiya enkampanini eyayisebenza ngemikhumbi kwase kuqala uthando lokusebenza kulo mkhakha.
“Kwesinye isikhathi awudingi ukusebenzela imali kodwa kufanele uvolontiye ukuze uthole ulwazi oluzokusiza ukuthi uthuthuke. Ngisebenzele inkampani yemikhumbi iminyaka engu-13, ngavolontiya inyanga eyodwa kwase kuvela isikhala somsebenzi. Ngenxa yokuthi ngangingaphakathi ngafaka isicelo somsebenzi ngaqashwa,” kusho uNkk Reddy.
Uthe ngo-2013 wakhetha ukushiya umsebenzi wakhe wavula inkampani iWomen in Shipping eqale ukusebenza ngo-2014.
“Okwenza ukuthi inkampani yami ingawi wukuthi ngizimisele ngomsebenzi engiwenzayo futhi ngifuna ukukhombisa amantombazane ami amabili ukuthi umuntu wesifazane uyakwazi ukuphumelela uma esebenza ngokuzikhandla. Ngiyacela ningasabi ukusungula izinkampani ngoba lukhona usizo ngeke niwe,” kusho uNkk Reddy.