Lihlehlile elamaphoyisa ezinja
KULINDELEKE ukuthi sikhishwe ngoLwesibili oluzayo isinqumo ngebheyili yamaphoyisa ophiko lwezinja aseNtshongweni asolwa ngokusabisa abantu okuthiwa ayebalumisa ngezinja.
OConstable Bhekani Dladla, Sipho Masango noMusawenkosi Khwela bacele ukukhululwa ngebheyili ecaleni lokusabisa.
Amaphoyisa asolwa ngokusabisa uMnuz Mthokozisi Mchunu ngokuthi azomdubula uma engalisuli icala lokumlumisa ngezinja awavulelele lona.
Bobathathu babekwe amacala amathathu, elokushaya ngenhloso yokulimaza, elenkohlakalo nelokusabisa.
Bangaphandle ngebheyili kwelokushaya ngenhloso yokulimaza nelenkohlakalo.
NgoLwesihlanu ummeli wabasolwa, uMnuz Tommy Reed, uthe bangamaphoyisa ngeke beqe, banemindeni abahlala nayo. Uthe kumele kubhekwe nokuthi umsolwa unelungelo lokukhululwa ngebheyili uma kungakatholakali ukuthi icala ulenzile ngempela yini.
UMshushisi uNdoda Januwari ngakolunye uhlangothi uthe amacala abasolwa ngawo bawenza besemsebenzini. Uphinde wathi leli cala libhekwe kakhulu umphakathi.
Umphenyi wecala, uMnuz Phumlani Ngcobo oyiPrincipal Investigating Officer kwi-Ipid, ngesikhathi esebhokisini lofakazi uthe ngesikhathi ebopha uConstable Khwela wasatshiswa ngumsolwa nozakwabo ayehamba nabo.
UKhwela waboshwa ezokweseka oDladla noMasango enkantolo.
“UKhwela wathi abantu abaqale le nto banabaqaphi mina anginabo.
“Ozakwabo ababehamba naye ngesikhathi ngimbopha enkantolo bangizungeza bebuzana ukuthi kulindweni, kungani ngingadutshulwa ngoba kuyacaca ukuthi kunempi ebhekiswe kulolu phiko,” kusho uNgcobo.
Kule nkantolo kuhlale kunonogada abalawula ukungena kwabantu ngoba bonke abantu basuke befuna ukungena ngaphakathi.
Imantshi ithe isinqumo izosikhipha ngo-Agasti 22.