Uhlule abomndeni owengozi
UBEKHUZWA ngokuziphatha kabi emgwaqweni wumndeni wakhe umshayeli wetekisi elashayisana nenye kwashona kulo abafundi abahlanu eDalton.
Lokhu kushiwo umndeni walo mshayeli enkonzweni yomngcwabo wabayisithupha abashona enkundleni yemidlalo esikoleni iMakeni, eDalton, ngoMgqibelo.
Omunye oshone kule ngozi umsizi womshayeli uSandile Ngcobo (15). Abafundi abashonile ngoSenamile Ngubane (12), Nosipho Mnyaka (14), Londani Ngubane (12), Mthokozisi Mgube (13) noWendy Zondi (12) abebefunda eMatatane Secondary nase-Cool Air Secondary.
UMnuz Nkosenye Ngubane utshele Isolezwe ukuthi bafe olwembiza njengoba belahlekelwe izingane ezintathu emndenini owodwa, umshayeli oyingane kamfowabo walimala kanzima.
“Kunzima kakhulu futhi namanje siyahluleka nokukhuluma. Emuva kwalo mngcwabo asazi sizoqhubeka kanjani nempilo. Kushone izingane zodadewethu ezimbili neyendodakazi kadadewethu, onina bayakhala. Ingane kamfowethu osashona ebishayela enye itekisi ebisengozini. Lo mfana wathatha ibhizinisi emuva kokushona kukayise. Besihlala ngokumkhuza ngokuziphatha kabi emgwaqweni manje asazi sizothini nakomakhelwane ngezingane zabo,” kusho uNgubane.
Uthe ngokwakhe ufisa abomthetho benze umsebenzi wabo ngabashayeli abathinteka kule ngozi.
Uthe itekisi ebishayelwa indodana iyona ebifaka isinkwa ekhaya nokwenza isimo sibe nzima kakhulu.
“Nami ngiyasebenza ematekisini eGreytown kodwa angazi ukuthi lo mdlalo (ichicken) obekuthiwa bebewudlala ngamatekisi owani. Sisadinga incazelo ngokwenzeka,” kusho uNgubane.
Uxolisile ngale ngozi, ikakhulukazi komakhelwane nathi kunzima nokubabheka ngenxa yesimo.
Isikhulu soMnyango wezokuThutha KwaZulu-Natal, uMnuz Sibusiso Gumbi, sithe uphenyo yilona oluzoholela ekuboshweni kwabantu ngale ngozi.
“UNgqongqoshe wezokuThutha KwaZulu-Natal, uMnuz Mxolisi Kaunda, ujube ithimba elizophenya ngale ngozi. Uma uphenyo seluphothuliwe sizobopha abathintekayo. Okusavelile ukuthi kukhona ijubane elibe khona kule ngozi. Sifuna nokubheka ukuthi bebenazo yini izimfanelo zokushayela, nezimvume zokuthutha abantu,” kusho uGumbi.
Isolezwe lithole ukuthi omunye umshayeli kusolwa ukuthi akanazo nezincwadi zokushayela kanti usedle phansi emuva kokuphuma esibhedlela.
Lokhu akuzange kuqinisekiswe amaphoyisa.
Okhulumela amaphoyisa KwaZulu-Natal uColonel Thembeka Mbhele, uthe akekho umshayeli osaboshiwe.
Isikhulu soMyango wezeMfundo KwaZulu-Natal, uMnuz Enock Nzama, sithe sebekhathele ukuklelisa amabhokisi bengcwaba abafundi abashone ngezingozi. Uthe ezokuthutha abafundi azineli kubo bonke abafundi njengoba bengaphezu kuka-2.8 million esifundazweni.
Kulo mngcwabo kuvele nokuthi izikole zendawo kumele zizinuke amakhwapha njengoba kunenqwaba yabafundi abazishiyayo baye ezikoleni ezikude.