Amasu owadingayo uma uhlela ukulungisa umuzi
EZABATHENGI
SIBANINGI esihlala emizini emidala esidinga ukulungiswa. Mhlawumbe omunye kwakungokagogo okusho ukuthi uthayela noma u-asbestos usugugile. Ngabe yini okumele uyazi ngaphambi kokulungisa umuzi?
Ukulungisa umuzi yinto ejabulisayo kodwa okumele uyihlelele ngokonga imali nokuxoxisana nomshwalense wakho ukuze ukhokhe uma kunenhlekelele eyenzekayo.
Ezabathengi zikhulume noNkk Lynda Brown oyiRegional Manager kwaMUA Insurance othe ukulungisa umuzi omdala kungaholela ekumoshekeni kwempahla nokonakala komuzi.
Uthe uma ulungisa umuzi kufanele wenze isiqiniseko sokuthi uyibekile imali eyanele wenza nocwaningo ngezinto ofuna ukuzilungisa.
“Uma ulungisa umuzi, ngisho noma ngabe mudala kangakanani, kufanele uxoxisane nenkampani yakho yomshwalense uzwe ukuthi yini abazoyikhokhela uma imosheka ukuze ungazitholi usubhodloze izindonga ongakwazi ukuzivala,” kusho uNkk Brown.
Ube esekhipha la masu ambalwa
- Okokuqala uma usufuna ukushintsha isakhiwo somuzi yenza isiqiniseko sokuthi uhambisa ipulani entsha kumasipala ukuze ayiphasise.
- Yenza isiqiniseko sokuthi ulungiselwa ngusonkontileka osemthethweni ukuze uma kukhona akonayo umshwalense ukhokhe.
- Kubalulekile ukubheka izitifiketi zikamakhi nokuthi zibhalisiswe yini kwiMaster Builders Association ngoba lokhu kuvimba izinkinga zezakhiwo eziqhekekayo.
- Qinisekisa ukuthi impahla yasendlini ibekwa egumbini eliphephile ukuze ingamosheki.
“Uma abantu belungisa imizi kuyenzeka ukuthi ifenisha yonakale ngakho kuba kuhle ukuthi uyihlele indawo ozoyigcina kuyona uma ulungisa umuzi omdala,” kusho uNkk Brown.
- Xoxisana nenkampani yakho yomshwalense ubone ukuthi yini ezoyikhokhela ngesikhathi ulungisa umuzi wakho.
Khonamanjalo kuleli sonto ngifonelwe ngabantu bekhala ngokuthi amaselula abo awasasebenzi, abanye bangitshele ukuthi bafonelwe ngabantu abathi bavela kwaVodacom, MTN nakwaCell C.
Ezabathengi zithinte lezi zinkampani zamaselula zathi kunamaqola azenza abasebenzi bazo bese ecela imininingwane yamakhasimende azo enze ama-sim swap.
UNkk Bridget Bhengu obhekele ezokuxhumana nokukhangisa kwaMTN udonse abantu ngendlebe wathi bangalokothi bakhiphe imininingwane yabo eyimfihlo ngoba kwaMTN abayidingi imininingwane yekhasimende eyimfihlo. “Uma abantu bethola ucingo lomuntu othi ufona kwaMTN ufuna ukubenzela i-simswap siyacela bangakhulumi naye. Abaphuthume basibikele ngoba kunamaqola asebenzisa igama lethu ukuvala amasimcard amakhasimende ethu. Asisoze sacela imininingwane yomuntu yasebhange, ekamazisi neminye eyimfihlo. Sicela abantu bangayidedeli le mininingwane ngoba sisebenza kanzima ukuqinisa ezokuphepha,” kusho uNkk Bhengu.
AbakwaCell C noVodacom nabo bagcizelele ukuthi abantu kufanele bawabike amaqola ukuze kuphele lo mkhuba.
Inhlangano eqoqa intela kuleli iSouth African Revenue Services (SARS) nayo icele abantu ukuthi bangadedeli imininingwane yabo eyimfihlo.
Njengoba kuyisikhathi sokufaka izicelo zokubuyiselwa imali kwaSARS baveze ukuthi kunabantu abafonela amakhasimende abo bawatshele ukuthi makalethe imininingwane eyimfihlo kanti lokhu kuphambene nomthetho.
Esitatimendeni esithunyelwe bathe ayikho imininingwane eyimfihlo abayidinga kubantu base becela ukuthi abathola imiyalezo yokuthi mabathumele imininingwane eyimfihlo mabaqale babike kwaSARS noma baphuthume emahhovisi ale nhlangano aseduze nabo.
Omunye umfundi uphinde wacela izinombolo zeNational Consumer Commission etholakala ku-www.thencc. gov.za nangokushayela u-012 428 7000/012 428 7726.
Niyacelwa ukuthi uma ninezikhalo niyisebenzise le nhlangano ngoba ikusiza mahhala.