‘Ungazibusisi ngemali eqondene nebhizinisi’
UMA abesifazane benikwe uxhaso lwemali abayeke ukuyixhaphaza ngokuthenga izinto ezingahlangene nebhizinisi.
Lesi sexwayiso sikhishwe uNgqongqoshe wezaMandla uNkk Mmamoloko Kubayi ngesikhathi kunesigcawu sokubonisana sabesifazane abakulo mkhakha eThekwini, ngoLwesihlanu.
“Ungaqali ngokuzibusisa, sebenzisa imali oyinikiwe ebhizinisini ukuze ube nemali eningi yokuzibusisa. Uma uzibusisa ngale yokuxhaswa izophela nebhizinisi lakho liwe ngoba awukwenzanga obekumele ukwenze. Lokho kwenza kwakho akuzuba yihlazo lakho kuphela, kuzovalela nabanye besifazane abafuna uxhaso olufanayo,” kusho uNgqongqoshe uKubayi.
Uthe kunabesifazane abathola uxhaso lokuqala igaraji likaphethroli bewumfelandawonye. Akuphelanga sikhathi esingakanani babanga ukuthi abanye bayayixhaphaza imali. Manje abaxhasi sebemanqinkanqika ukuxhasa imifelandawonye efuna ukungena kuleli bhizinisi.
“Okunye okumele sifunde ukukwenza wukuthi singagcini ngokugxeka sithi amathuba awekho kodwa singenzi lutho. Ngiphoxeke kabi kungekho ngisho oyedwa umuntu wesifazane ofake isicelo somsebenzi wePhini likaMqondisi-Jikelele ophikweni lukagesi obukhangisiwe,” kusho uNgqongqoshe uKubayi.
UNkk Elizabeth Marabwa oyisikhulu sezinhlelo zokulingana ngokobulili kulo mnyango uthe abesifazane kwesinye isikhathi abazifaki izicelo zomsebenzi ezikhundleni eziphezulu yize noma bazi ukuthi imfundo yabo iyabavumela ngoba bayazi ukuthi kuyenzeka kungapheli neminyaka emithathu besezikhundleni.
“Bakubona kungewona umqondo omuhle ukuthi ukhuphukele esikhundleni esiphezulu kanti uzozihlahlela indlela yokuphuma kuleyo nkampani. Njengamanje sisungule amasu okuthi kube nohlaka oluzokweseka abesifazane abasemkhakheni wezamandla,” kusho uNkk Marabwa.
UNkk Anne Githuku-Shongwe we-United Nations Women uthe inkinga yokutholakala koxhaso lwezimali ikhungethe abesifazane emhlabeni wonke.
“Sihlale sitshelwa ukuthi kunemali yokuxhasa abesifazane emikhakheni eyehlukene kodwa ukuluthola lolo xhaso kunzima satshe. Amafomu okuthola uxhaso anezinto eziningi zokuhlunga bonke abantu abasesigabeni sokungena kulo mkhakha ikakhulukazi abesifazane,” kusho uNkk Githuku-Shongwe.