OweSuperSport uphonsele iSafa inselelo ngeyeBafana
ISIKHULU sezinhlelo kwaSuperSport, uSifiso Mbambo, sicacise ngokushaywa indiva kwemidlalo yeBafana Bafana kulesi siteshi esesizakhele ugazi ngokusakaza imidlalo yebhola eseqophelweni eliphezulu.
Imidlalo yeBafana iyindlala kulesi siteshi esisanda kumemezela ukuthi sizosakaza imidlalo engu-380 ye-English Premier League.
ISuperSport ilinyusile izinga nasemidlalweni yeConfederation of Africa Football (CAF) kwazise imidlalo eminingi yeCaf Champions League, Caf Confederation Cup, African Youth Championship namaligi akwamanye amazwe e-Afrika iyisakaza bukhoma.
Njengamanje iBafana idlala imidlalo yokuhlungela ukuzibekisela indawo kwiCaf African Nations Championship eseKenya ngonyaka ozayo. Le midlalo ayiveli kwithelevishini. KwiCosafa Cup iSuperSport ibiphethe amalungelo okusakaza lo mqhudelwano. Yingakho iBafana iveziwe.
UMbambo uphonsele izikhulu zeSafa inselelo yokuthi imidlalo yeBafana itholakale kwaSuperSport.
“ISafa kumele ihlale phansi ibheke indlela ibhizinisi elisebenza ngayo. Saya kwiPremier Soccer League ngoba sibona ukuthi nayo iyasidinga. Uma iSafa ingasiboni isidingo sokuthi sibe yingxenye yayo ngeke siyibambe ngenkani. Imidlalo yamaqembu esizwe isazoqhubeka nokudonsa izinkumbi zabantu. Nakanjani kumele imidlalo yakhona isakazwe kwiSABC noma kwiSuperSport. Thina njengeSuperSport siyazazi ukuthi sisakaza imidlalo ngeqophelo eliphezulu. Isinqumo nesinqumo esithathwayo sithathwa ngokubheka ibhizinisi. ISafa kungenzeka ukuthi ithathe isinqumo ngokubheka ibhizinisi layo,” kusho uMbambo.
Ngempelasonto iBafana idlale ngokulingana ngo 2-2 neZambia emlenzeni wokuqala womzuliswano wokugcina wokuhlungela ukuzibekisela indawo kwiChan. Owesibili ungoMgqibelo eLevy Mwanawasa Stadium, eNdola, eZambia.
“Isiteshi sethu siyakhokhelwa ngakho kumele senze isiqiniseko sokuthi abantu sibanika izinto eziseqophelweni eliphezulu. Nginenhlanhla yokuthi ngihola ithimba labantu abancane abanekhono futhi abawuthandayo umsebenzi wabo. Uhlelo obelaziwa ngeMonday Night Football ngeke lusaba khona. Indawo yalo izothathwa yiFanZone. Siphoqeleke ukuthi siluvale ngoba sibona ukuthi lucishe lufane neFanZone. . Abantu abaningi abafona kwiFanZone ngabalapha eNingizimu Afrika,” kusho uMbambo.