Isiphakamiso sikaMarumo kusongwa eyeCoca Cola
INGWAZI yeMamelodi Sundowns nePlatinum Stars uSimba Marumo iphonsele inselelo izinkampani zaseNingizimu Afrika yathi azifake imali emiqhudelwaneni yabafana abancane ukuze kuthuthuke ibhola.
UMarumo ukusho lokhu ngemuva kokuphela kwemidlalo yeCopa Coca Cola Under-15 Football Tournament eCato Manor, eThekwini ngempelasonto.
Kulo mqhudelwano bekuhlungelwa imidlalo kazwelonke ezoba seBloemfontein ngenyanga ezayo.
I-DR JL Dube High School idle ubhedu kulo mqhudelwano ngemuva kokuguqisa iKing Senzangakhona High School yaseZululand emdlalweni wamanqamu.
Lesi sikole saKwaMashu sesizomela iKwaZulu-Natal emidlalweni kazwelonke eBloemfontein ngemuva kokuwina ngo 2-0. UMarumo oyinxusa leCopa Coca Cola exoxa neSolezwe ngemuva komqhudelwano ucele ezinye izinkampani ukuthi zifake isandla ekufukuleni ibhola emazingeni aphansi.
“Imiqhudelwano efana neCopa Coca Cola Under-15 Football Tournament imqoka kakhulu. Ngifisa sengathi ngabe kunenqwaba yemiqhudelwano yalolu hlobo ukuze sikwazi ukuthola ukhilimu wabadlali. Kwesinye isikhathi kuba nzima ukuvumbulula ikhono ngomqhudelwano owodwa. Ukube kuya ngami ngabe zonke izigaba zinemiqhudelwano yakhona. Ukwanda kwemiqhudelwano yalolu hlobo kunganciphisa isimo lapho amaqembu amaningi ezifakela khona ingcindezi yokunqoba kumnyama kubomvu. Unyaka ozayo ukude kakhulu,” kusho uMarumo.
I-JL Dube inengcindezi kwazise iJG Zuma High School yaseNanda iyona ebe ngompetha bazwelonke ngonyaka odlule.
“Njengoba kuneDanone Under 12, McDonald Under-14 neCopa Coca Cola kungcono ukube kukhona ne-Under 13 Maize Cup. Imiqhudelwano yeqophelo eliphezulu njengale iyindlala eNingizimu Afrika. Izinkampani ezihlomula kakhulu kubantu abamnyama yizona okumele zitshale imali ekuthuthukiseni ibhola. IWisa Maize Meal neTastic nje kuthengwa kakhulu abantu abamnyama. Noma kunjalo kodwa kumele zinconywe izinkampani ezifana noCoca Cola ngomsebenzi omuhle eziwenzayo ekuthuthukiseni ibhola,” kusho uMarumo.
I-JL Dube ize yaqeda ingakaze ishaywe. Emidlalweni yamaqoqo iqede esicongweni ngamaphuzu amane ngemuva kwemidlalo emibili. Emidlalweni emine iJL Dube idedele igoli elilodwa.