ISharks ibingelele uMatfield ngesibhaxu kwiLions
ICELL C Sharks ilunyomfe yaluqeda usuku lokuqala emsebenzini kumqeqeshi omusha weGolden Lions, uVictor Matfield ngesikhathi beyijikela esiswini njengotshwala inqoba ngo 47-31 koweCurrie Cup ogijinywe ngoMgqibelo ntambama, e-Ellis Park, eGoli.
Lo mdlalo okuyiwe kuwona ekhefini zihamba phambili ngo 25-5 ezikaMatfield osanda kuthatha umsebenzi njengomqeqeshi wabadlali baphambili, uphele sekuyiSharks ezihola phambili okungumphumela oyibeke esicongweni kwazise phakathi nesonto inqobile futhi kwiBlue Bulls.
UMatfield wodumo kumaBhokobhoko nakwiBulls usayine ngeledlule kwiLions ezovala isikhala esivuleke ngokushiya kukaJohan Ackermann ohambe nendodana yakhe uRuan bajoyina iqembu laseEngland, iGloucester.
Kunesikhathi lapho iLions eke yahamba khona phambili ngo 31-5 esiwombeni sesibili kodwa ukuthola ikhadi elibomvu kukaRobbie Coetzee ogxobe ebusweni umdlali weSharks kuwuguqulile lo mdlalo laqala lahlasela ngamandla iqembu laseThekwini.
Ngemuva kokuphuma kukaCoetzee bese kuyiqembu elilodwa kuphela enkundleni kwazise iSharks ibisilokhu ibuye izikhawu emapalini eLions. UCoetzee ulokhu eqhubeke njalo nokuzakhela igama elibi kuCurrie Cup kwazise leli khadi elibomvu bese kungelesibili kulo nyaka kwazise uhlawuliswe ngendlela efanayo kwiVodacom Super Rugby ngesikhathi bebhekene neSouthern Kings ngoMeyi.
Ukunqoba obekuphelezelwa iphuzu lombhanso kubeke iSharks esicongweni lapho igudluze khona iFree State Cheetahs. Kwenzeka konke lokhu iLions namanje esabatshazwa ngobuqhawe bayo kuSuper Rugby ilele isibili emsileni kuCurrie Cup.
Uqokwe njengomdlali wosuku uJacques Vermeulen kwazise ushaye ama-try amabili. Ukunqoba kweSharks lapha kuyibeke ebuhleni kwazise ngempelasonto ezayo inekhefu lomgomo (bye).
Isiyonke imiphumela yeCurrie Cup ihambe kanje:
Golden Lions 31-47 Sharks; Western Province 45-34 Blue Bulls; Free State Cheetahs 25-30 Griquas