IDowns ikhishelwe esibayeni sayo
yingoba uDenis Onyango uyagula.
Unozinti omusha uRazak Brimah waseGhana usalinde amaphepha amgunyaza ukuthi adlale kuleli okuyinto efanayo nakoCuthbert Malajila noMokgakolodi Ngele bobabili abasalinde awabo abavumela ukuthi sebengabhaliswa njengabangumsinsi wokuzimilela eNingizimu Afrika.
NgakwiMaritburg, uSiyanda Xulu ongomunye wabadlali abalandwe kwiChiefs naye uqale ebhentshini okube yinto efanayo nakonozinti uJethren Barr, Mxolisi Kunene noRushine De Reuck. Akukho minyakazo etheni ebonakale esiwombeni sokuqala ngaphandle kokuthi iSundowns ibixakeka yijubane leMaritzburg. Ngaphandle kwamabhola amabili amade uHlompho Kekana awashayile, akukho bungozi obebukhonjiswa iqembu lasekhaya. NgakwiMaritzburg u-Evans Rusike ubeyiphela endlebeni ikakhulukazi kuThabo Nthethe obekumele amjahe isikhathi esiningi kwazise uTeboho Langerman ubehlale njalo ephambili eyofuna amagoli. UBilliat uze wazama ukushayela unozinti weMaritzburg ngemizuzu yokugcina kodwa ladlula eceleni kwepali.
Esiwombeni sesibili iSundowns ibe nebhadi ngesikhathi i-freekick enhle kaKekana iwele ekhanda likaNthethe yamudla unozinti weMaritzburg kodwa yashaya ipali yabuyela enkundleni. Ngalesi sikhathi iSundowns ibisingena ngamandla iqhamuka ngasophondweni lwesokunxele. Kusabhekwe iSundowns, uRusike ubeke phambili iMaritzburg ngelihle igoli ngomzuzu ka-58. UMosimane ufake u-Anthony Laffor endaweni kaYannick Zakri ngemuva kokungena kwaleli goli.
Ugcine ephumile uRusike ngenxa yokulimala kwangena u-Andrea Fileccia endaweni yakhe kodwa lokhu kugqitshwe ukungena kukaManyisa othathe indawo kaSibusiso Vilakazi ngomzuzu ka-73. Lokhu kulandelwe enye inhlokomo sekungena uLebese endaweni kaKhama Billiat ngomzuzu ka-81. UKekana uthole amathuba amathathu ngemizuzu yokugcina kodwa amhlula.