‘Ngizoxoxa noBongi uma iDowns ingenankinga’
UMQEQESHI omusha waMaZulu, uCavin Johnson, uvule isifuba ngothando lwakhe lokusebenzisana nomgadli weMamelodi Sundowns, uBonginkosi Ntuli.
UJohnson noNtuli basebenze kahle kwiPlatinum Stars kulama sizini amabili edlule. UNtuli uke wabolekiswa kuMaZulu kumasizini amathathu edlule. Usuthu seluke lwasho ukuthi lungathanda ukusayina uNtuli.
UJohnson ufike ngesonto eledlule kuMaZulu. Uvale isikhala sikaJoey Antipas waseZimbabwe.
“UBongi ungumfana womZulu ngakho akumele acabange kaningi. Kumele eze lapha. Mina noBongs sesisebenze iminyaka emine ndawonye. Sinobudlelwano obuhle naye. Uma iSundowns ingenankinga sizohlala naye phansi sixoxe,” kusho uJohnson.
UNtuli usesikwatini seBafana Bafana esidlala emidlalweni yokuhlungela ukuzibekisela indawo kwi-African Nations Championship. ISundowns kubukeka sengathi izophinde imbolekise uNtuli nakule sizini.
Phambili iSundowns igabe ngoLeonard Castro, Yannick Zakri no-Anthony Laffor obuye adlale ngasezinhlangothini.
“Abekhona amanye amaqembu abengifuna kodwa ngeke ngidalule amagama awo. Kunamaqembu amabili ake angithinta. Njengomqeqeshi uzibekela wena umbandela. Into ebalulekile wukuthi ngenze isiqiniseko sokuthi iqembu lisesimeni esikahle, lidlala ibhola elihle futhi siwina imidlalo ethize ukuze sikwazi ukungena kwiTop 8,” kusho uJohnson.
Usuthu lubuyele esigabeni esikhulu ngemuva kwamasizini amabili ludlala kwiNational First Division (NFD). Luthenge isitifiketi seThanda Royal Zulu sokudlala esigabeni esikhulu.
“Angizange ngicabange kaningi ngokuthatha umsebenzi wokucija AmaZulu. Ngizimisele ngokusiza iqembu ekutheni libuyele lapho lifanele khona. Okwamanje angikwazi ukuthi ngithi iqembu lidinga ukuqiniswa kuphi ngoba ngisalijimise kanye kuphela,” kusho uJohnson.
“Inselelo engibhekene nayo eyokuthi ngenze isiqiniseko sokuthi ngikufaka emakhanda abadlali ukuthi ngifuna sidlale kanjani. Umqeqeshi engithathe kuyena ubesebafundise ezinye izinto kula masonto ayisithupha edlule. Nami kumele ngibenze basheshe baqonde ukuthi ngifuna sidlale kanjani. Abadlali kumele kushaye isikhathi sokuqala kwemidlalo sebekulungele ukudlala. Imidlalo emihlanu yokuqala imqoka,” kusho uJohnson.
Usuthu luzovula neFree State Stars eKing Zwelithini Stadium ngoMgqibelo emdlalweni walo wokuqala weligi.