AmaProteas angase abe nomqeqeshi omnyama?
UYASHUBA umbango womsebenzi wokucija amaProteas okuvela kuwo amagama abaqeqeshi ababili abamnyama.
UGeoffrey Toyana ocija iBizhub Highveld Lions eNingizimu Afrika no-Ottis Gibson waseWest Indies, ocija abashwibi eqenjini lesizwe lase-England, babalwa kulabo okungase kukhethwe kubona.
UToyana uthe uselinde sinqumo seCricket South Africa (CSA). Emasontweni amabili amaProteas azobe eseshaya ngomqeqeshi omusha. UToyana wayesifakile isicelo somsebenzi.
“Njengoba wazi isicelo somsebenzi ngasifaka. Emasontweni edlule ngibizelwe kwinhlololwazi lapho engifike khona ngaphekwa ngemibuzo yethimba elizoqoka umqeqeshi weqembu lesizwe. Ngemuva kwalokho sibe sesitshelwa ukuthi singathi vu ngezindaba ezithinta amaProteas. Okwamanje sengilinde i-CSA.”
Usezakhele igama ngokukhiqiza abadlali abaphelela kumaProteas. Phakathi kwabadlali abadlule ngaphansi kwesandla sakhe kukhona uChris Morris, Kagiso Rabada, Stephen Cook, Temba Bavuma, Hardus Vijloen, Reeza Hendricks, Dwaine Pretorius, Eddie Leie no-Aaron Phangiso.
Phezu kwalokho uToyana usezinqobe zonke izicoco ezikhona eNingizimu Afrika. Uphethe eseMomentum One Day Cup, Sunfoil Series neseRam Slam T20 Challenge. Umqeqeshi, odabuka eSoweto, waqopha umlando eminyakeni eyedlule eqokwa njengomqeqeshi wokuqala omnyama ukucija iqembu lekhilikithi.
“Njengamanje ngimatasa nokulungiselela iqembu isizini entsha. Iningi labadlali bethu basemaqenjini esizwe. Iningi labadlali engisebenza nabo ngabadlali abancane. Yinto engiyithandayo ukusebenza nabadlali abancane ngoba lokho kuhlale kukunika inselelo entsha njengomqeqeshi. Uma abanye sebengene kwelesizwe kumele sivumbulule abanye abazongena kwelesizwe.”
AmaLions awazange awine lutho ngesizini edlule kwazise asekwenze usiko ukunqoba izicoco selokhu kwafika uToyana eqenjini.