Udalula abadlali ababhalise kwiCaf
UMQEQESHI weSuperSport United, u-Eric Tinkler, uphumele obala ngabadlali abathathu ababhalise kwiCAF Confederation Cup ngemuva komdlalo wezakhe neKaizer Chiefs eMoses Mabhida Stadium, eThekwini, ngempelasonto.
NgoLwesihlanu iConfederation of Africa Football (CAF) iwuvalile uphawini wokubhaliswa kwabadlali. Amaqembu azodlala emidlalweni yemikhumulajezi athole ithuba lokubhalisa abadlali abathathu abasha kulo mqhudelwano.
ISuperSport izogadulisana neZesco yaseZambia kumaquarterfinal eConfederation Cup. Umlenze wokuqala useNingizimu Afrika ngoSepthemba 15 bese kuthi owesibili udlalwe ngoSepthemba 22.
“Yebo singabadalula abadlali abathathu esibabhalisa kwiCAF. Sibhalise uSiyabonga Nhlapo, Prince Dube noSipho Mbule. UDove Wome ubevele ekhona ohlwini yize eke abolekiswa kwi-Orlando Pirates phakathi nesizini,” kusho uTinkler.
UNhlapo ubekade egijima kwiBidvest Wits kodwa maphakathi nesizini edlule ubolekiswe kwiHighlands Park egawulwe yizembe.
UTinkler useke wafinyelela kowamanqamu weConfederation Cup. Ngo-2014 waguqiswa yi-Etoile du Sahel yaseTunisia. Ngo-2013 ube yiphini likaRoger de Sa ngesikhathi eZimnyama zihlulwa yi-Al Ahly kowamanqamu weCAF Champions League.
UTInkler yisizini yakhe yokuqala neSuperSport. Uthathe indawo kaStuart Baxter oshiye iSuperSport wajoyina iBafana Bafana.
Ephawula ngokuhlula kwabo iChiefs, uTinkler uvumile ukuthi Amakhosi abeyiqembu elingcono kunabo ngomdlalo. ISuperSport ikhiphe iChiefs kwiMTN8 ngo 1-0 wegoli likaJeremy Brockie alishaye esiwombeni sokuqala.
“Bekuwumdlalo onzima, isivivinyo esinzima kithina. Ngicabanga ukuthi emizuzwini ewu-15 yokuqala siyibambe kahle, sathola igoli. Emuva kwalokho iChiefs isithwese ubunzima kakhulu. Noma besizama ukuhlasela kodwa ibivele ilithathe iqale ukusihlasela ngokushesha. Kubonakele ukuthi sisele cishe ngamasonto amabili esimeni okufanele sibe kusona,” kusho uTinkler.
“Kodwa sayibona iChiefs ibhekene nePirates, sayibona indlela ecindezela ngayo kusuka phambili, nendlela edlala ngayo. Bekubalulekile ukuthola iqhinga lokubhekana nalokho. Besizama ukuhlala emuva, sibazume ngamabhola asheshayo. Lokho kusheshe kwasisebenzela kodwa ngaphandle kwalokho sithwale kanzima.”