IGagasi FM nemiklomelo yembokodo yaseKZN eyenza kahle
IGAGASI FM selisungule imiklomelo yokuhlonipha abesifazane abenza kahle emikhakheni eyahlukene emphakathini yaKwaZulu-Natal.
Le miklomelo ibizwa ngamaShero Awards kanti awokuqala azoba seLambert House, eMorningside, ngo-Agasti 31.
Okhulumela umsakazo, uKhulekani Shandu, uthe inhloso wukugqamisa abesifazane bakulesi sifundazwe abenza kahle kusona, ezweni nasemhlabeni jikelele. Uthe babheka nabesifazane abenza umehluko empilweni yabanye.
Uthe bafuna ukugqugquzela abanye ukuthi nabo benze okungcono.
“Sihlonipha futhi sibonga abesifazane abenza izinto ezinhle emiphakathini yabo ngaphandle kokubheka okuthize. Siyabagqugquzela ukuthi babe ngosomabhizinisi futhi bakhule,” kusho uKhulekani.
Uthe ngeke kube yibona abaqoka abesifazane kodwa ngabalaleli babo abakhetha abantu abenza kahle emiphakathini yangakubo.
“Abalaleli bayasibhalela basithumelele abantu abafuna ukuthi baqokwe. Bayachaza ukuthi kungani kumele baqokwe. Sizobe sesihlunga emagameni abasithumelele wona,” kusho uKhulekani.
Iminxa ihlanganisa ezobuciko, ezokungcebeleka nomculo, ezemidlalo, ubuchwepheshe, amabhizinisi, ezemfundo, nokunye.
UKhulekani uthe minyaka yonke ngenyanga yabesifazane kukhona abakwenzayo njengesiteshi. “Eminyakeni eyedlule besijwayele ukuba nomcimbi wokuthi bahlangane bakhe ubudlelwano. Yikulo nyaka lapho sesiqala khona ukwethula imiklomelo,” kuchaza uKhulekani.
Uthe emcimbini wokuklonyeliswa kwabanqobile kuzongena abaqokiwe kuphela nezimenywa ezikhethekile. Umcimbi uzoqala ngo-2 emini kuze kube wu-7 ebusuku.