Udide umndeni ozibhunyele ngopharafini wazishisa
USADIDEKILE umndeni wowesifazane oneminyaka engu-33 waseBhambayi, eNanda okuthiwa uphuze upharafini, wazibhunyela ngawo wazokhela ngomlilo, washonela esibhedlela.
UNksz Khululiwe Ngcobo (33) ushonele esibhedlela ngoMgqibelo ngemuva kokuzishisa ekuseni endlini abeqashe kuyo noyise wezingane zakhe.
Uyise wezingane kuthiwa ubelele endlini nengane yabo eneminyaka emihlanu ngesikhathi ezishisa kanti uvuswe yisililo sikaNksz Ngcobo.
Umfowabo kamufi, uMnuz Nkosingiphile Ngcobo, uthe badidwa wukuthi kungani ekhethe ukuqeda ngempilo yakhe ngalolu hlobo.
“Asazi ukuthi kungani enze lokhu kodwa ubeke wazwakalisa ukungathokozi ngodaba lwesihlobo esamdlwengula esemncane. Isihlobo bese sifuna udaba lukhulunywe wumndeni kodwa udadewethu ubengafuni ukuba le ndaba ikhulunywe ngoba ethi iyamhlukumeza kakhulu,” kusho uNgcobo.
Uthe ufike esibhedlela udadewabo eseshonile wathi ubeshe kakhulu kodwa basola ukuthi ukuphuza upharafini nakho kube nomthelela ekutheni agcine eshonile.
Isolezwe lithole ngomthombo walo osondelene nalolu daba ukuthi owesifazane wezwakala ekhala ngo-1 ekuseni. Kuthiwa uyise wezingane wayezama ukumcima ngamanzi kodwa kwanhlanga zimuka nomoya ngisho esesizwa nangabanye abaqashe nabo. Kuthiwa kwase kuvele inyama emhlophe, eshe umzimba wonke kodwa esakhuluma. Isolezwe lizwe nokuthi yize engazange adalule sizathu ngesenzo sakhe kodwa waveza ukuthi “ubesekhathele wukuphila”. Ngokusho kukaNgcobo, udadewabo wathumela i-sms komunye udadewabo nakuyise wezingane ebacela ukuthi bamgadele izingane zakhe.
Umufi ubenezingane ezimbili, eneminyaka engu-13 neneminyaka emihlanu.
UNgcobo uthe basahlanganisa amakhanda ngomngcwabo ngoba umndeni wabo uKwaMaphumulo.
Okhulumela amaphoyisa KwaZulu-Natal, u-Lt Colonel Thulani Zwane, uthe amaphoyisa avule idokodo ngokushona komuntu.
Ngesikhathi Isolezwe livakashele emqashweni abehlala kuwona izolo, uyise wezingane okuvele ukuthi unguMthoko (isibongo asitholakalanga), uthe akukho angakukhuluma nezintatheli ngoba ushonelwe futhi kuzohlekiswa ngaye.
Kuthiwa lezi zithandani bezineminyaka zihlala ndawonye.