Kusale abathathu enkundleni kade bedubulana namaphoyisa
AMADODA amathathu asale enkundleni emuva kokutholana phezulu namaphoyisa ngenhlamvu emgaqweni uM13, ePinetown, izolo.
Isehlakalo senzeke ngesikhathi amaphoyisa elandela umkhondo wemoto iVW Golf ebihamba amadoda amane abesolwa ngokubamba inkunzi onogada bemoto ethwala imali egaraji iCaltex, eHillcrest.
Kuthiwa abone efana nale abeyalelwe yona ayijaha efuna ukuyisesha ukuthi akuyona yini kodwa umshayeli wayo wenyusa ijubane ejahe ukuyojoyina umgwaqo uN3, wehlulekile ukuyilawula yagingqika yalala ngokhakhayi kuM13.
Okhulumela amaphoyisa kulesi sifundazwe, uCol Thembeka Mbhele, uthe amalungu omphakathi asebenzisana namaphoyisa ahlale ezulazula emigwaqweni yaseHillcrest abone kubanjwa inkunzi egaraji afonela amaphoyisa aseHillcrest, uphiko lwezinja nawaseChartsworth.
“Ngesikhathi amaphoyisa eyibona imoto nabebephakathi kuyo ungathi bese bewabonile. Umshayeli wayo wenyuse ijubane, amaphoyisa nawo amhlala ezithendeni, wehluleka ukuyilawula, yagingqika yashaya ungqimphothwe. Abebephakathi baphume kuyo imoto badubula bebhekise emaphoyiseni nawo aphindisela.”
Amadoda amathathu asale enkundleni eyodwa elimalle iphuthunyiswa esibhedlela,
Ngesikhathi sokushicilela bekungakaziwa ukuthi abafile bangobani futhi abakuphi kodwa imoto ebebehamba ngayo ibinezinombolo zaseGoli.
Uthe kuvulwe icala lokubamba inkunzi kuhlonyiwe, elokuzama ukubulala nophenyo ngokufa kwabathathu.
“Endaweni yesehlakalo kutholakale ibhokisi le mali nezibhamu. Umsolwa olimele kusazobhekwa isimo sakhe. Uma esengcono uzothweswa amacala.”